Հայաստանի հետ շարունակվող հակամարտության պայմաններում Ադրբեջանը երրորդ երկրի միջոցով հասկացրել է, որ ցանկանում է զենք գնել Հնդկաստանից։ Դրա մասին գրում է հնդկական ThePrint պարբերականը։
Սակայն խնդրանքը, որը եկել էր շատ բարեկամ երկրի միջոցով, Հնդկաստանն անտեսել է։
Նյու Դելին բարեկամ ժողովրդին հասկացրել է, որ Հնդկաստանը ինքնուրույն է որոշելու իր երկկողմ հարաբերություններն ու առաջնահերթությունները և չի ցանկանում, որ որևէ այլ երկիր միջնորդի դեր խաղա:
Իրավիճակին ծանոթ աղբյուրները նշում են, որ Բաքուն երբեք ուղղակիորեն այդ հարցը չի բարձրացրել Նյու Դելիի հետ:
Փոխարենը Հնդկաստանին դիմել է երրորդ երկիրը՝ հայտարարելով, որ եթե Նյու Դելին ցանկանում է արտահանել իր զենքը և երկարաժամկետ գործընկեր է փնտրում, կարող է հայացքը դարձնել դեպի Ադրբեջան։ Իրավիճակին ծանոթ աղբյուրները նշում են, որ Ադրբեջանը պատրաստ է ռազմական համաձայնագրեր կնքել։
Հնդկաստանի համար Հայաստանը ոչ միայն մշտական գործընկեր է պաշտպանական ոլորտում, այլև դիտարկվում է որպես քաղաքական պարտնյոր է տարածաշրջանում և սերտ կապեր ունի Ֆրանսիայի հետ։
Երևանն իր հերթին վճռականորեն պաշտպանում է Ջամուի և Քաշմիրի հարցում Հնդկաստանի դիրքորոշումը։ Հնդկաստանը, Ֆրանսիան և Հունաստանը ցանկանում են աջակցել Հայաստանի անվտանգության կարողություններին:
2017 թվականից Բաքուն, Անկարան և Իսլամաբադը կենտրոնացել են եռակողմ համագործակցության խորացման վրա։ Այս տարվա հուլիսին երեք երկրների ղեկավարները Ղազախստանում Շանհայի համագործակցության կազմակերպության (ՇՀԿ) գագաթնաժողովի շրջանակում եռակողմ գագաթնաժողով են անցկացրել, և Բաքուն պաշտպանել է Իսլամաբադի դիրքորոշումը Ջամուի և Քաշմիրի վերաբերյալ դեռևս 2023 թվականին։
