Ռուսաստանի Պետական դումայի ընտրություններում ՀԱՊԿ Խորհրդարանական վեհաժողովի դիտորդական առաքելության կազմում Հայաստանի ներկայացուցիչներ չկան։ Այս մասին ՌԻԱ Նովոստիին հայտնել է միջազգային դիտորդների խմբի ղեկավար Ռուստամ Շոհմուրոդը։
«Ո՛չ, Հայաստանը ներկայացված չէ, նրանք սառեցրել են իրենց մասնակցությունը ՀԱՊԿ-ին։ Այստեղ ևս նրանք չկան․ դա իրենց որոշումն է», — նշել է Շոհմուրոդը։
ՀԱՊԿ ԽՎ-ի հրապարակած դիտորդական կենտրոնական խմբում ընդգրկված են Բելառուսի, Ղազախստանի, Ղրղզստանի, Տաջիկստանի և Սերբիայի ներկայացուցիչները։ Հայաստանն այս ցուցակում բացակայում է։ Առաքելությունը դիտարկում է իրականացնում Մոսկվայում, Մոսկվայի մարզում, ինչպես նաև ՀԱՊԿ անդամ երկրներում բացված արտասահմանյան ընտրատեղամասերում։
Հայաստանի վարչապետ Նիկոլ Փաշինյանը 2024-ի փետրվարին հայտարարել էր ՀԱՊԿ-ում Երևանի մասնակցության սառեցման մասին՝ պատճառաբանելով, որ կազմակերպությունը, հայկական կողմի գնահատմամբ, չի կատարել Հայաստանի հանդեպ ստանձնած անվտանգային պարտավորությունները։
Պետդումայի 9-րդ գումարման ընտրությունների քվեարկությունն անցկացվում է սեպտեմբերի 18-ից 20-ը։ Միասնական քվեարկության շրջանակում Ռուսաստանի ութ մարզերում անցկացվում են նաև տեղական իշխանությունների ուղղակի ընտրություններ։ Ընդհանուր առմամբ նախատեսված է տարբեր մակարդակների ավելի քան 2,2 հազար ընտրարշավ։
ՀԱՊԿ ԽՎ առաքելությունը քվեարկության ընթացքին հետևում է սեպտեմբերի 18-ից։ Դիտորդները ներկա են եղել ընտրական տեղամասերի բացմանը, ինչպես նաև հանդիպումներ անցկացրել ՌԴ խորհրդարանական կուսակցությունների ներկայացուցիչների և Դաշնության խորհրդի ղեկավարության հետ։ Առաքելությունը նախատեսում է ընտրությունների արդյունքներով ամփոփիչ եզրակացություն ներկայացնել։
