Կառավարությունն այսօր որոշում կայացրեց, ըստ որի ձմռանն ամառային անվադողով երթեւեկողները կտուգանվեն 5000 դրամով, իսկ եթե իրենց մասնակցությամբ վթար է եղել, ապա 20 հազար դրամով:
Կառավարության նիստում փոխվարչապետ Մհեր Գրիգորյանը հայտարարեց այն մասին, որ հաջորդ որոշմամբ պետք է խստացնեն սանկցիաները ոչ ձմեռային անվադողերով երթեւեկող վարորդների համար՝ կապելով ԱՊՊԱ-ի հետ, տեխզննության հետ: Նա անլուրջ համարեց 5 հազար դրամ տուգանքը:
«Սենց սիմվոլիկ տուգանքներով չի աշխատելու կարգավորումը: Եթե այդպիսի ավտոմեքենան ձմռանը վթարի է ենթարկվել, ես կարծում եմ՝ հաջորդ ապահովագրության վճարը պետք է 10 անգամ ավելի բարձր լինի, քան ստանդարտը: Եթե մենք ապահովագրական մեխանիզմների ճնշումը այս կարգավորումներին զուգահեռ չմեծացնենք, հաշվի առնելով ավանդույթները, մարդիկ ուղղակի սպասում են ակտի: Առավելեւս, եթե իրենց վտանգը 5 հազար դրամի տուգանքն է, վախենամ, որ սպասեն տուգանքի, այլ ոչ թե կատարեն պահանջը: Սա շատ լուրջ հարց է, քանի որ երրորդ անձանց գույքային իրավունքի եւ կյանքի հարց է; Անվադող ձմռանը չփոխելը մարդասպանություն է»,-ասաց նա:
Փոխվարչապետ Տիգրան Խաչատրյանն էլ տեղեկացրեց, որ այս տարի ՆԳՆ-ն ներդրել է առցանց գրանցումների համակարգ, որտեղ յուրաքանչյուր ավտոտրանսպորտային պատահարից հետո պարեկը այնպիսի տեղեկություններ է ներբեռնում համակարգում, որ հետագայում մենք կարողանալու ենք վերհանել, թե որ ժամանակում եւ ինչպիսի հանգամանքներում է առաջացել վթարը. «Դա ժամանակ կպահանջի եւ մենք որոշեցինք, որ չենք սպասելու դրան»:
Վարչապետ Նիկոլ Փաշինյանը հարցրեց, թե ինչ արժե ձմեռային անիվը եւ ստացավ պատասխան՝ մոտ 30 հազար դրամ:
