ՀՃՇ անդամ Ռուզաննա Ստեփանյանը ֆեյսբուքյան իր էջում գրում է.
Արտաքին գործերի նախարարի Հայոց Ցեղասպանության միջազգային ճանաչումն ու դատապարտումը Հայաստանի Հանրապետության առաջնահերթությունը չլինելու մասին հայտարարությունը խիստ մտահոգիչ է և անընդունելի:
Այն ուղղակիորեն հակասում է ՀՀ անկախության հռչակագրին, որտեղ հստակ ամրագրված է Հայոց ցեղասպանության միջազգային ճանաչման և պահանջատիրության սկզբունքը։
Նման հայտարարությունը ոչ միայն խախտում է մեր պետականության հիմնարար փաստաթղթի դրույթները, այլև անտեսում է Սահմանադրական դատարանի որոշումները:
Հայոց ցեղասպանության ճանաչումն ու դրա հետևանքների վերացումը չեն կարող լինել պարզապես պատմաբանների ուսումնասիրության առարկա: Դա մեր ժողովրդի արդար պահանջատիրության անբաժանելի մասն է, պետական քաղաքականության գերակա ուղղություն և միջազգային իրավունքի տեսանկյունից՝ արդարության վերականգնման հրամայական:
Կոչ ենք անում վերանայել այս վտանգավոր դիրքորոշումը, որը փորձում է նսեմացնել Հայոց ցեղասպանության հարցը և այն դուրս բերել քաղաքական օրակարգից: Նման մոտեցումը ոչ միայն վիրավորում է զոհերի հիշատակը, այլև թուլացնում է մեր պետության դիրքերը միջազգային ատյաններում:
Հայոց ցեղասպանության ճանաչումն ու հատուցումը պետք է շարունակեն մնալ մեր արտաքին քաղաքականության առանցքային առաջնահերթությունները: Սա ոչ միայն պատմական արդարության վերականգնման, այլև տարածաշրջանում կայուն խաղաղության հաստատման և նման ոճիրների կանխարգելման գրավականն է:
