Երևանում հասարակական տրանսպորտի ուղեվարձի թանկացման դեմ բոյկոտը շարունակվում է. Այս մասին ասվում է «Հայաքվե» քաղաքացիական ազգային միավորման հայտարարության մեջ:
«Քաղաքապետի պաշտոնը զբաղեցնող Տիգրան Ավինյանը և նրա տեղակալները ի սկզբանե մոլորության մեջ գցեցին հանրությանը, սա ոչ թե հասարակական տրանսպորտի ուղեվարձի իջեցում է, այլ թանկացում: Ուղեվարձը չպետք է գերազանցի 100 դրամը։ Քանի դեռ օրենսդրական դաշտում չի սահմանվել ողջ բնակչության համար ընդունելի ծախսեր, քաղաքացիները չպետք է վճարեն ուղեւորության համար։ Եթե քաղաքացիները տուգանվեն, կարող են դիմել Երևանի Աբովյան 25 հասցեում գտնվող «Հաաքվեի» գրասենյակ և փոխհատուցում ստանալ՝ ցույց տալով տուգանքի անդորրագիրը։
Ստորագրահավաքի հիման վրա հրավիրված ավագանու նիստը տապալվեց «Քաղաքացիական պայմանագիր» և «Հանրապետություն» կուսակցությունների կողմից, ինչը վկայում է թանկացման իրավական հիմքերի բացակայության մասին։ Տիգրան Ավինյանն ու նրա տեղակալներն իրավունք չունեն ինքնուրույն որոշումներ կայացնել, դա պետք է արվի ավագանու նիստում, սակայն նիստը տապալվեց: Մենք թույլ չենք տա, որ նրանք հասարակության հետ խոսեն շուկայական գների լեզվով և բարեփոխումների անվան տակ մտնեն ժողովրդի գրպանը։ Իշխանությունների ողջ գնային քաղաքականությունը ի սկզբանե անհիմն էր:
Հարցերի դեպքում քաղաքացիները կարող են զանգահարել 033 97 82 81 հեռախոսահամարով»,- ասված է հաղորդագրությունում։
