Ես վստահ եմ, որ Հայաստանն առաջ է տանում խաղաղության գործընթացը։ Այս մասին, այսօր՝ ապրիլի 2-ին, ԱԺ-ում լրագրողների հետ զրույցում նշեց ՔՊ-ական պատգամավոր, ԱԺ արտաքին հարաբերությունների հանձնաժողովի նախագահ Սարգիս Խանդանյանը:
«Հայաստանն անում է քայլեր, որոնք կառուցողական են ու որոնք նպաստում են գործընթացի առաջխաղացմանն ու չլճացմանը։ Նման քայլերից ամենավառ ամենացցունը խաղաղության պայմանագրի տեքստերի շուրջ համաձայնության գալն էր և առաջարկը՝ բանակցություններ սկսել ստորագրման շուրջ։ Ուստի ես կարծում եմ, որ պետք է շարունակենք այս տրամադրվածությամբ աշխատել։
Իհարկե միակողմանի գործընթաց չէ և արդարացիորեն դուք կնշեք, որ արդյունքներ չի տալիս գործընթացը, բայց ես կարծում եմ, որ որոշ արդյունքների մենք այնուամենայնիվ հասել ենք: Այն, որ տեքստը ամբողջությամբ համաձայնեցված է, դա կարևոր արդյունք է»,- ասաց նա:
Խանդանյանը չցանկացավ մեկնաբանել Ադրբեջանի իր պաշտոնակցի խոսքերը, ով իրեն անվանել էր «պոպուլիստ»։
«Ես դա չեմ կիսում, բայց եթե դա այդպիսի ընկալում ունի, ինձ համար պրոբլեմ չէ՝ լինել պոպուլիստ, եթե դա միտված է խաղաղությանը»,- ընդգծեց Խանդանյանը։
Նրա կարծիքով՝ պոպուլիզմը շատ սարսափելի բառ չէ. «Եկեք դրանից չվախենանք։ Ես դրանից բացարձակ վատ չեմ զգացել»։
Հիշեցնենք՝ Ադրբեջանի Միլլի Մեջլիսի արտաքին և միջխորհրդարանական հարաբերությունների հանձնաժողովի նախագահ Սամադ Սեյիդովը մերժել է ՔՊ-ական պատգամավոր, ԱԺ արտաքին հարաբերությունների հանձնաժողովի նախագահ Սարգիս Խանդանյանի առաջարկը՝ հանձնաժողովների հանդիպում անցկացնելու վերաբերյալ։
