Իսրայելի արտաքին գործերի նախարար Գիդեոն Սաարը հայտնել է, որ կառավարության առաջիկա նիստում կներկայացնի բանաձև, որով կոչ է արվում, որ Իսրայելն առաջին անգամ պաշտոնապես ճանաչի Հայոց ցեղասպանությունը։ Ինչպես հաղորդել է Ynet պորտալը, դրան նախորդել էր ԱՄՆ նախագահ Դոնալդ Թրամփի հայտարարությունը, որը Թուրքիայի նախագահ Էրդողանին իր ընկերն էր անվանել այն բանի համար, որ նա «հեռու է մնացել Իրանի հետ հակամարտությունից», և խոստացել էր, որ Իսրայելի և Թուրքիայի միջև առճակատում չի լինի։
Բանաձևի նախագծում ասվում է, որ «ելնելով բարոյական և պատմական պարտքից՝ Իսրայելը ճանաչում է Օսմանյան կայսրության վերջին շրջանում հայ ժողովրդի դեմ իրականացված ցեղասպանությունը»։ Նշվում է, որ Իսրայելը պետք է դատապարտի այդ իրադարձություններին վերաբերող պատմական ճշմարտության ժխտումը, նվազեցումը կամ խեղաթյուրումը։
Բանաձևի բացատրական գրությունում նշվում է, որ Հայոց ցեղասպանությունը սկսվել է 1915 թվականի ապրիլին՝ Կոստանդնուպոլսում հարյուրավոր հայ մտավորականների, առաջնորդների և ուսյալ գործիչների ձերբակալությամբ, տեղահանությամբ և սպանությամբ։ Դրանից հետո օսմանյան կառավարությունը սկսել է «հայ բնակչության համակարգված ոչնչացումը»։ Նշվում է, որ 32 երկիր տարբեր ձևերով ճանաչել է Հայոց ցեղասպանությունը, հիշատակվում է, որ Իսրայելը պետք է անի դա «բարոյական և պատմական պարտքի համատեքստում»։
Հայոց ցեղասպանության ճանաչման հարցը նախկինում բազմիցս բարձրացվել է Իսրայելում, սակայն այդպես էլ չի ընդունվել որպես կառավարության պաշտոնական դիրքորոշում։ 2016 թվականին Կնեսետի կրթության հանձնաժողովը հայտարարել էր Հայոց ցեղասպանության ճանաչման մասին։ 2018 թվականի մայիսին, Իսրայելի և Թուրքիայի հարաբերությունների վատթարացման ֆոնին, Կնեսետի լիագումար նիստը հավանություն էր տվել նմանատիպ ճանաչման քննարկմանն ու քվեարկությանը, սակայն կառավարությունը մինչ օրս չի ճանաչել ցեղասպանությունը։
