Հայտնի է, որ հենց ԵԱՏՄ-ի մեր գործընկերներն են մեզ մղում Եվրամիության հետ մերձեցման։ Այս մասին, այսօր՝ օգոստոսի 26-ին, լրագրողների հետ զրույցում հայտարարել է Հայաստանի խորհրդարանի խոսնակ Ռուբեն Ռուբինյանը՝ պատասխանելով Ռուսաստանի Պետդումայի նախագահ Վյաչեսլավ Վոլոդինի քննադատությանը։
Ռուբինյանի խոսքով՝ նրանք մշտապես ասում են, որ Հայաստանը պետք է հանրաքվե անցկացնի, սակայն դա հնարավոր է միայն այն դեպքում, եթե, ի թիվս այլնի, հարցը ձևակերպված լինի։
Նա պարզաբանել է, որ անհնար է պարզապես հանրաքվե անցկացնել, եթե չեն իրականացվել դրան ուղեկցող քայլերը։
«Հանրաքվեն հնարավոր կլինի անցկացնել միայն ԵՄ անդամակցության հայտ ներկայացնելու, դրական արձագանք ստանալու և ժամկետների մասով հստակություն ունենալու դեպքում։ Նշված հանգամանքների բացակայության պատճառով այժմ հանրաքվե անցկացնել հնարավոր չէ», — հավելել է Ռուբինյանը։
Նա հավաստիացրել է, որ Հայաստանի իշխանությունները միշտ եղել են անկեղծ։ «Ռուսաստանի հետ հարաբերությունների վատթարացմանն ուղղված քայլեր կատարողը մենք չենք։ Ընդհակառակը, մենք արել և շարունակում ենք անել ամեն ինչ, որպեսզի ունենանք նորմալ, բարեկամական հարաբերություններ», — ընդգծել է Հայաստանի խորհրդարանի խոսնակը։
Այս համատեքստում նա անարդար և անհամաչափ է անվանել հայ տնտեսավարողների նկատմամբ սահմանափակումները, որոնք չեն համապատասխանում հայ-ռուսական հարաբերությունների ոգուն, առավել ևս՝ ԵԱՏՄ կանոններին։
«ԵԱՏՄ-ի ամբողջ իմաստը ապրանքների ազատ և անմաքս տեղաշարժն է։ Այս դեպքում դե ֆակտո այդպիսի ազատություն չկա», — եզրափակել է պատգամավորը։
Նա հավելել է, որ Երևանը, այսպես թե այնպես, գիտեր, որ ազատ է որոշում կայացնելու ԵՄ-ին և ԵԱՏՄ-ին իր անդամակցության հարցում։ «Եվ, ընդհանուր առմամբ, Երևանն այժմ ազատ կլինի իր ընտրության մեջ։ Ինչպես նշեց հարգարժան Պեսկովը Հայաստանն ազատ է իր ընտրության մեջ», — ընդգծել է Ռուբինյանը։
