Թուրքամետ «Հայաթ Թահրիր ալ-Շամ» խմբավորումը հայտարարել է, որ գրավել է Սիրիայի մայրաքաղաք Դամասկոսը, և որ Սիրիայի նախագահ Բաշար Ասադը փախել է երկրից, հայտնում է Al Jazeera-ն։
«Հայաթ Թահրիր ալ-Շամի» առաջնորդ Աբու Մուհամեդ ալ-Ջուլանին հայտարարել է, որ կառավարական բոլոր հաստատությունները կմնան Սիրիայի ներկայիս վարչապետի վերահսկողության տակ, քանի դեռ դրանք պաշտոնապես չեն հանձնվել։
Ինչպես հաղորդում է ՏԱՍՍ-ը՝ վկայակոչելով Սիրիայի ներկայիս վարչապետ Մուհամմեդ Ղազի ալ-Ջալալիի հեռուստաուղերձը, սիրիացի զինյալների Դամասկոս մտնելուց հետո նա հանրապետության իշխանությունը խաղաղ ճանապարհով փոխանցելու պատրաստակամություն է հայտնել ։
«Մենք ձեռք ենք մեկնում ընդդիմախոսներին, որոնք հաստատել են, որ չեն վնասի որևէ մեկի, ով մեր հայրենիքի մաս է կազմում… Մենք պատրաստ ենք աշխատել նրանց հետ այնպես, որ նրանց տրամադրենք հնարավոր ամբողջ օգնությունը և աստիճանաբար հանձնենք կառավարության գործերը՝ ապահովելով պետական օբյեկտները»,- ասել է նա:
Սիրիայի վարչապետը նաև հայտարարել է, որ չի հեռանալու Դամասկոսից՝ կոչ անելով պահպանել հասարակական ինստիտուտները։ Նա մտադիր է շարունակել աշխատանքը՝ հանրապետությունում տեղի ունեցող իրադարձությունների ֆոնին պետական կառույցների գործունեությունը ապահովելու համար։
«Մենք հավատում ենք Սիրիային բոլոր սիրիացիների համար: Մենք հավատում ենք, որ այն կարող է լինել նորմալ պետություն, որը լավ հարաբերություններ է կառուցում իր հարևանների և աշխարհի հետ՝ առանց տարածաշրջանային դաշինքների կամ բլոկների մեջ մտնելու։ Դա կախված է նրանից, թե ինչպիսի ղեկավարություն կընտրի սիրիացի ժողովուրդը»,- հավելել է վարչապետը։
