«Դուք միշտ աչքի եք ընկել ձեր կոշտ հռետորաբանությամբ․ փաստորեն փոխում եք ձեր իմիջը, կկարողանա՞ք ամբողջ ընթացքում պահել նոր իմիջը»,- ճեպազրույցի ժամանակ լրագրողը հարց ուղղեց ԱԺ նորընտիր նախագահ Ռուբեն Ռուբինյանին։ «Համաձայն չեմ ձեր կարծիքի հետ, կասեմ, որ ես աչքի եմ ընկել շատ բարեկիրթ հռետորաբանությամբ, դա ճաշակի կամ մոտեցման հարց է»,- պատասխանել է Ռուբինյանը՝ նշելով, որ իմիջը սուբյեկտիվ և խաբուսիկ բան է, մեկի համար գնահատվում է որպես կոշտ, մյուսի համար՝ ոչ կոշտ։ «Կարծում եմ՝ քաղաքական գործիչները կարող են սուր, կոշտ հռետորաբանություն կիրառել, բայց կարևորն այն է, որ այն չհատի զրպարտության, զազրախոսության և անբարեկրթության, պարզ՝ անդաստիարակության սահմանը։ Բնականաբար, մնալու ենք այդ սահմանների մեջ և ակնկալում ենք, որ մեր ընդդիմադիր գործընկերն ու նաև լրագրողները կմնան այդ սահմանների մեջ»,- շարունակեց ԱԺ նախագահը:
