Երևանի ավագանու նախկին անդամ Նարե Սոսեն, որը Հայաստանը լքելուց հետո 2024 թվականի հունվարին տեսաուղերձով հայտնեց, որ իրեն առևանգել են, սպառնալիքներ հնչեցրել, ապա ոստիկանությունում տեսախցիկի առաջ ստիպել են ցուցմունք տալ, ժամանել է Հայաստան։
Oragir.News-ը կապ հաստատեց Երևանի ավագանու «Մայր Հայաստան» խմբակցության ղեկավար Մանուկ Սուքիասյանի հետ, վերջինս հաստատեց տեղեկությունը, Նարե Սոսեին 2024 թվականի մայիսին է տեսել Երևանում։
«Նախօրեին իր ծննդյան տարեդարձն էր, շնորհավորել եմ։ Ինքն այս ընթացքում պարբերաբար կապի է դուրս գալիս, հետո որոշ ժամանակով կապը կտրվում է։ Մայիսին՝ Սրբազան շարժման օրերին տեսել եմ Սուրբ Աննա եկեղեցու բակում, առանձնազրույց ենք ունեցել»,- ասաց Սուքիասյանը։
Հարցին՝ միջադեպի վերաբերյալ մանրամասներ ճշտե՞լ եք, հետաքրքրվե՞լ եք, ավագանու անդամը պատասխանեց․
«Որևէ խոսակցություն այդ մասով չեմ ունեցել, որովհետև գործընթացն իրավական տիրույթում է, և ակնկալում ենք, որ այդ ամենը սպառիչ հանգուցալուծում կունենա իրավական դաշտում»։
Նարե Սոսեն իր ուղերձում ասել էր, որ իր կյանքին վտանգ է սպառնում, որպեսզի չարժանանա Արմեն Գրիգորյանի ճակատագրին՝ լքել է Հայաստանը։ Չե՞ք հարցրել նրան՝ արդյոք այդ վտանգները վերացե՞լ են, որ եկել է Հայաստան, հարցրեցինք Մանուկ Սուքիասյանին։
«Ես կդժվարանամ միանշանակ ինչ-որ բան ասել։ Որ իր շուրջ ինչ-որ բան էր կատարվում, դա ակնհայտ էր մեզ համար։ Բայց մանրամասնությունները, կարծում եմ՝ այս պահին դեռևս որոշակի անհստակեցումներ ունի»,- ասաց Սուքիասյանը։
Ճշտող հարցին՝ այս պահին Նարե Սոսեն Հայաստանո՞ւմ է, ավագանու անդամը պատասխանեց, որ ծննդյան տարեդարձը ինտերնետային տարբերակով է շնորհավորել, և որ այդ մասին չի հարցրել․
«Այս պահի հետ կապված ստույգ ոչինչ չեմ կարող ասել։ Ինքը պարբերաբար հայտնվում է, հետո կապից դուրս է գալիս։ Անմիջական հանդիպում չի եղել երեկ, մեսինջերով եմ շնորհավորել»։
Նշենք, որ Քննչական կոմիտեն մայիսի 24-ին հայտնել էր, որ Նարե Սոսեին առևանգելու դեպքի առթիվ նախաձեռնված քրեական վարույթը կարճվել է․ Նախաձեռնվել էր նոր քրեական վարույթ՝ սուտ մատնության հատկանիշներով։
Oragir.News-ը կապ հաստատեց նաև Քննչական կոմիտեի մամուլի քարտուղար Գոռ Աբրահամյանի հետ։ Հետաքրքրվեց, թե ի՞նչ փուլում է քրեական վարույթը, արդյոք հարցաքննվածներ կա՞ն։
«Նարինե Հայրապետյանի նկատմամբ քրեական հետապնդում է հարուցվել և հետախուզում է հայտարարվել»։
