Իսրայելական տանկերն առաջ են անցել բուֆերային գոտուց և տեղակայվել Սիրիայի հարավում գտնվող Քաթանա բնակավայրի մոտ, հայտնում է լիբանանյան Al Mayadeen հեռուստաալիքը։ Բնակավայրը գտնվում է Դամասկոսից 21 կմ հեռավորության վրա։
Ինչպես հայտնում է Al Mayadeen-ը, իսրայելական զորքերը մտել են Դամասկոսի արվարձանների մի քանի գյուղեր։
Իսրայելական բանակն ավելի վաղ հայտարարել էր, որ նախատեսում է ցամաքային գործողություններ իրականացնել միայն բուֆերային գոտու ներսում, այլ ոչ թե դրանից դուրս:
Իսրայելական կործանիչները Սիրիայում Բաշար ալ Ասադի իշխանության տապալումից հետո հարվածներ են հասցրել ավելի քան 250 ռազմական օբյեկտների։ Իսրայելական բանակի Galei IDF ռադիոյի աղբյուրը տեղի ունեցողն անվանել է իսրայելական օդուժի պատմության մեջ ամենախոշոր հարձակողական գործողություններից մեկը։
Նոյեմբերի 27-ին սիրիական ընդդիմադիր զինված խմբավորումների անդամները լայնածավալ հարձակում են սկսել Հալեպ և Իդլիբ նահանգներում կառավարական դիրքերի դեմ։ Դեկտեմբերի 7-ի երեկոյան Սիրիայի նախագահ Բաշար ալ Ասադի հակառակորդները գրավել են մի քանի խոշոր քաղաքներ՝ Հալեպը, Համան, Դեյր էզ Զորը, Դարաան և Հոմսը։ Կիրակի առավոտյան նրանք մտել են մայրաքաղաք Դամասկոս, որից հետո սիրիական բանակի ստորաբաժանումները լքել են քաղաքը։ Սիրիայի նախագահ Բաշար ալ Ասադը ներսիրիական բանակցություններից հետո լքել է պաշտոնը և երկիրը։
