Սուրեն Սուրենյանցը ֆեյսբուքյան իր էջում գրում է.
Անցած երկու օրերին բախվել եմ մի խնդրի հետ, որի մասին անգամ փոքրիկ մի ռեպլիկ եմ գրել:
Երկուշաբթի օրը Mediahub-ում իմ քսան րոպեանոց հեղինակային հաղորդումը տեսագրել եմ մեկ ժամից ավելի, որովհետև հոսանքը պարբերաբար միացվում- անջատվում էր:
Երեկ հարցազրույցի էի «Հրապարակ» օրաթերթում. այս անգամ «կոմֆորտն» ավելի «կատարյալ» էր՝ հոսանք ընդհանրապես չկար:
Մի քանի օր առաջ Օպերայի ակադեմիական թատրոնի շենքում ներկայացման ժամանակ հոսանքը տարել են, ընդ որում՝ Պետերբուրգից ժամանած խմբի ներկայացման ժամանակ:
Երեկ նույն խայտառակությունը կրկնվել է մարզական միջազգային մրցման ժամանակ:
Աբովյան քաղաքի մարզադաշտում ընթացող Կոնֆերենցիաների լիգայի փլեյ-օֆֆի «Նոա»– «Ռուժոմբերոկ» խաղի ժամանակ լույսերն անջատվել են:
Ո՞վ է պատասխան տալու այս խայտառակ վիճակի համար, որն արդեն իմիջային հետևանքներ է ունենում մեր երկրի համար:
Հայաստանի իշխանությունները և նրանց արբանյակները սլաքներն ուղղում են ՀԷՑ-ի ուղղությամբ, ակնարկում են սաբոտաժի, ինչ-որ «ռուսական հետքի» մասին:
Այս ամենը գուցե նաև արժանահավատ թվար, եթե տոտալ ճգնաժամ չլիներ մեր կյանքի բոլոր ոլորտներում, որոնցում դժվար է ռուսական հետք գտնել՝ անգամ մոլագար «հեղափոխական ուղեղների» համար:
Քրեածին իրավիճակի բում, կառավարման զրո արդյունավետություն՝ ֆորսմաժորային դրսևորումներով:
Հայաստանի դուռը թակում են քաոսն ու «բեսպրեդելը». մենք հայտնի կենդանու համառությամբ դա չնկատել ենք տալիս:
