ՔՊ-ից հեռացված պատգամավոր Հովիկ Աղազարյանն ու «Պատիվ ունեմ» խմբակցության պատգամավոր Տարոն Մարգարյանը կզրկվեն անձեռնմխելիությունից։
«Քաղաքացիական պայմանագիր» խմբակցությունը համաձայնություն տվեց ՀՀ գլխավոր դատախազ Աննա Վարդապետյանի միջնորդություններին։
Հովիկ Աղազարյանի դեպքում քվեարկությանը մասնակցել է 67 պատգամավոր, կողմ է քվեարկել 65 պատգամավոր, դեմ՝ 2-ը։
Տարոն Մարգարյանի դեպքում՝ 67 պատգամավոր, 67-ն էլ կողմ է քվեարկել։
Վարդապետյանը, հիշեցնենք, Ազգային ժողովին է ներկայացրել պատգամավորներ Տարոն Մարգարյանի և Հովիկ Աղազարյանի նկատմամբ քրեական հետապնդում հարուցելուն համաձայնություն տալու միջնորդություններ։
Տարոն Մարգարյանի գործը վերաբերում է Երևանի դպրոցներին և մանկապարտեզներին պատկանող հողերի ապօրինի օտարմանը, պաշտոնեական լիազորությունների չարաշահմանը և առանձնապես խոշոր չափերով փողերի լվացմանն առնչվող հոդվածներին այն ժամանակահատվածում, երբ նա եղել է Երևանի քաղաքապետը։
Հովիկ Աղազարյանը կասկածվում է այն բանի համար, որ խոշոր չափի կաշառքի դիմաց խոստացել է կազմակերպել մանր եղջերավորների արտահանումն առանց կարանտինի։ Մեկ այլ քրեական գործի շրջանակում Աղազարյանը կասկածվում է 23 հազար դոլար կաշառք ստանալու մեջ՝ Երևանի Աջափնյակ համայնքում վթարային դպրոցի շենքի կառուցապատման գործընթացում միջնորդելու խոստման դիմաց։
Պատգամավորներն իրենց առաջադրված մեղադրանքները չեն ընդունում։
