Արարատի մարզի Քաղցրաշեն գյուղում մահացած 13-ամյա աղջիկը ջերմել է, իսկ գլխի հատվածում թարախային բորբոքային պրոցեսներ են եղել։ Այս մասին «Փաստինֆո»-ին հայտնել է Քաղցրաշենի վարչական ղեկավար Աշոտ Խալաթյանը։
Նշենք, որ դեռահասի մահվան դեպքը գրանցվել էր օրերս, իսկ այսօր, ինչպես նշեց վարչական ղեկավարը, եղել է աղջկա հուղարկավորությունը։ Մամուլում տեղեկություններ էին շրջանառվել, թե ողբերգության պատճառը էներգետիկների չարաշահումն է եղել։
«Չգիտեմ, թե ինչու են էներգետիկների մասով անընդհատ խոսում։ Գյուղացիների շրջանում էլ նման խոսակցություն կա, թե չարաշահել է։ Երեխան ջերմել է, տեղափոխել էին հիվանդանոց, գլխի հատվածում թարախային պրոցես է եղել։ Մնացածի վերաբերյալ ավելի հստակ բժիշկները կարող են ասել»,- ասել է նա։
Վարչական ղեկավարն ընդգծել է նաև, որ երեխան մարզիկ էր և զբաղվում էր ֆուտբոլով։
«Աղջիկը ֆուտբոլիստ էր, մարզիկ։ Գյուղում աղջիկների ֆուտբոլի թիմ կա, շատ լավ էր խաղում։ Արդեն նույնիսկ մեր հավաքականներից էին նրան հրավիրում»,- հավելել է նա։
