ԱՄՆ նախագահ Դոնալդ Թրամփի կողմից Իրանի և Իսրայելի միջև հրադադարի մասին հայտարարությունը անակնկալի է բերել նրա վարչակազմի որոշ պաշտոնյաների, հաղորդում է The New York Times-ը՝ հղում անելով Սպիտակ տան բարձրաստիճան պաշտոնյայի։
Նրա խոսքով՝ Կատարի էմիր շեյխ Թամիմ բին Համադ ալ Թանին որոշակի դեր է խաղացել Իրանի և Իսրայելի միջև ժամանակավոր հրադադարի վերաբերյալ համաձայնությունների ձեռքբերման գործում։ Աղբյուրի խոսքով՝ ամերիկյան կողմից համաձայնության հասնելուն նպաստել են փոխնախագահ Ջեյմս Դեյվիդ Վենս, պետքարտուղար Մարկո Ռուբիոն և ԱՄՆ նախագահի հատուկ դեսպանորդ Սթիվ Վիտկոֆը, որոնք դիվանագիտական ուղիներով կապի մեջ էին Իրանի հետ։
Սպիտակ տան պաշտոնյան հավելել է, որ Իսրայելը համաձայնել է հրադադարին՝ պայմանով, որ դադարեցվեն Իրանի կողմից հարձակումները, սակայն չի նշել, թե ինչ պայմանների կարող է համաձայնվել Թեհրանը։
Հունիսի 24-ի գիշերը ԱՄՆ նախագահ Դոնալդ Թրամփը հայտարարել է, որ Իրանը և Իսրայելը համաձայնել են հրադադար մտցնել։ Նրա խոսքով՝ դրա ուժի մեջ մտնելուց հետո աշխարհը կողջունի «12-օրյա պատերազմի պաշտոնական ավարտը»։
