«Ես մինչև հիմա գիտեի, որ իմ խոսքը տագնապ է առաջացնում, մարդիկ խուսափում են ինձ հետ հանդիպելուց. բազմաթիվ դեպքեր են եղել, երբ որպես քաղաքացի եմ եկել ԱԺ ու մարդիկ, իմ տպավորությամբ, խուսափել են ինձ հետ հանդիպելուց, բայց որ իմ լռությունից էլ կարող են վախենալ, սա ինձ համար բացահայտում էր այս նիստերի ընթացքում»,- ԱԺ-ում հայտարարել է ընդդիմադիր խմբակցության պատգամավոր Էդգար Ղազարյանը:
Ազգային ժողովը շարունակում է ԱԺ նախագահի տեղակալների ընտրության հարցի քննարկումը։ Ընդդիմադիր «Ուժեղ Հայաստան» խմբակցությունն ԱԺ նախագահի տեղակալի պաշտոնում ընտրելու համար առաջադրել է Արամ Վարդևանյանի թեկնածությունը։
Անդրադառնալով հարցին՝ Ղազարյանն ասաց. «Վարդևանյանի թեկնածությունն առաջադրել ենք, որպեսզի որակապես փոխենք այս համակարգը: Եթե պարոն Վարդևանյանը թեկուզ մեկ նիստ նախագահի, բոլորս կհամոզվենք՝ ինչ է նշանակում՝ նիստ նախագահելու հանրային ծառայության բարձր որակ»:
