Այսօր՝ օգոստոսի 7-ին, ողբերգական դեպք է տեղի ունեցել Շիրակի մարզում: Ժամը 11:50-ի սահմաններում ՀՀ ՆԳՆ քրեական ոստիկանությունում օպերատիվ տեղեկություններ են ստացվել, որ Ախուրյան խոշորացված համայնքի Անիի տարածաշրջանի Շիրակավան գյուղից հիվանդանոց է տեղափոխվել տղամարդու դի: Այս մասին հայտնում է shamshyan.com–ը։
Տեղում պարզվել է, որ ստացված օպերատիվ տեղեկությունը հավաստի էր և Շիրակավանի միջնակարգ նոր կառուցվող դպրոցի տարածքից հիվանդանոց տեղափոխելու ճանապարհին մահացել է Շիրակի մարզի բնակիչ 39-ամյա Արտյոմ Ծ.-ն:
Ըստ նախնական տեղեկությունների, նշված դպրոցում վերամբարձ կռունկով աշխատանքներ կատարելիս շինարարական երկաթե կոնստրուկցիաները թափվել են նրա վրա։
Դեպքի փատով Արթիկի և Անիի քննչական բաժնում նախաձեռնվել է քրեական վարույթ:
Կայքի փոխանցմամբ դպրոցը կառուցվում էր ՀՀ կառավարության հովանավորությամբ՝ Հայաստանի տարածքային զարգացման հիմնադրամի կողմից:
Շինարարության մեկնարկը տրվել է 2024 թվականի դեկտեմբերի 24-ին:
Նախագծային կազմակերպությունը «Եռանկյուն Պրոջեքթ» ՍՊԸ-ն է, տեխնիկական վերահսկումը իրականացնում է Շիրակի մարզում հաշվառված «ԱԳԵԱ» ՍՊԸ-ն:
