ԱՊՀ-ն տեսնում է ինչպես Հայաստանի, այնպես էլ Ադրբեջանի կողմից Համագործակցության աշխատանքներին մասնակցելու հետաքրքրություն։ Այս մասին TASS-ին տված հարցազրույցում հայտարարել է ԱՊՀ կանոնադրական և այլ մարմիններում Ռուսաստանի Դաշնության մշտական ներկայացուցիչ Անդրեյ Գրոզովը։
«Ցանկանում եմ ընդգծել, որ մենք տեսնում ենք թե՛ ադրբեջանական, թե՛ հայկական կողմերի հետաքրքրությունը մեր ասոցիացիայի աշխատանքներին մասնակցելու հարցում», — ասել է նա։
Պատասխանելով ԱՊՀ շրջանակներում Հայաստանի և Ադրբեջանի փոխգործակցության վերաբերյալ հարցին՝ Գրոզովն ընդգծել է, որ Համագործակցության հարթակում մասնակիցները ձգտում են «լուծել բոլոր ծագող հարցերը՝ բարիդրացիության և փոխադարձ հարգանքի մթնոլորտում»։
«Իսկ ռուսական կողմից մենք միշտ ձգտում ենք մեր գործընկերներին կառուցողական փոխգործակցության նախապատրաստել։ Պետություններն իրենք են որոշում կայացնում, առաջնորդվելով իրենց սեփական նկատառումներով, մասնակցելու որոշակի մարմինների աշխատանքներին։ Սա նրանց ինքնիշխան իրավունքն է», — մեկնաբանել է մշտական ներկայացուցիչը՝ ԱՊՀ տնտեսական խորհրդի նիստում Ադրբեջանի ներկայացուցիչների բացակայության վերաբերյալ։
