«Ժողովուրդ» օրաթերթը գրում է. «Երեկ հայտնի էր դարձել, որ Վերաքննիչ հակակոռուպցիոն դատարանը բեկանել է որոշումը, որով Սամվել Կարապետյանի նկատմամբ տնային կալանք էր կիրառվել, և նրան կրկին պիտի տեղափոխեն ԱԱԾ մեկուսարան։
«Ժողովուրդ» օրաթերթը տեղեկացավ, որ կալանքի փոփոխման որոշումը կայացրել է Սուրեն Խաչատրյանը։
Ինչ ճանապարհ է անցել ՀՀ հակակոռուպցիոն դատարանի կոռուպցիոն հանցագործությունների վերաբերյալ վարույթներով մասնագիտացմամբ դատավոր Սուրեն Խաչատրյանը:
Դատավորն իր կարիերան սկսել է որպես իրավախորհրդատու, ապա հարկային տեսուչ։ Լինելով բնիկ Ճամբարակից, Խաչատրյանը աշխատել է Տավուշի մարզի քննչական բաժնի Դիլիջանի քննչական բաժանմունքում՝ որպես քննիչ, ապա 8 տարի աշխատել է որպես դատախազ և եկել է Երևան։ 2022 թվականից Սուրեն Խաչատրյանը զբաղեցնում է ներկայիս պաշտոնը։
Ինչ ունեցվածք ունի Սուրեն Խաչատրյանը․
2024 թվականի տարեկան հայտարարագրի համաձայն՝ Հակակոռուպցիոն դատարանի կոռուպցիոն հանցագործությունների վերաբերյալ վարույթներով մասնագիտացմամբ դատավոր Խաչատրյանը հայտարարագրել է 8 անշարժ գույք՝ 1 բնակարան բազմաբնակարան շենքում, 5 հողամաս, 1 հողին ամրակայված այլ անշարժ գույք, 1 ՀՀ օրենսդրության համաձայն նոր կառուցված, ձեռք բերված և անշարժ գույքի կադաստր վարող լիազոր մարմնի կողմից հաշվառված ու գնահատված այն շինությունները, որոնք դեռևս չեն ստացել իրավունքների պետական գրանցում։
8 գույքից 7-ը գտնվում են Ճամբարակ համայնքում, իսկ բնակարանը՝ Երևանի Արաբկիր վարչական շրջանում։
Դատավորը հայտարարագրել է տվյալ տարվա սկզբում առկա HYUNDAI մակնիշի մեքենա, որը ձեռք է բերել 2022 թվականին 6 մլն դրամով։
Խաչատրյանի բանկային հաշիվների մնացորդները կազմել են 72 հազար դրամ, կանխիկ դրամական միջոցները՝ 5 հազար դոլար և 10 մլն դրամ, որը տարեսկզբի համեմատ նվազել է 2 մլն դրամով։
Հաշվետու տարվա եկամուտները կազմել են 45 մլն 151 հազար դրամ, որից 15 մլն 151 հազար դրամն աշխատանքի վարձատրություն է ՀՀ ԲԴԽ աշխատակազմ Դատական դեպարտամենտից, 6 հազար դրամը՝ Արդարադատության ակադեմիայից։ Եկամուտներից 29 մլն 993 հազար դրամը ստացված փոխառություն է Արդշինբանկից։
2023 թվականի հետ համեմատած 2024 թվականին դատավորի աշխատանքի վարձատրությունը նվազել է գրեթե 3 մլն դրամով։
Ստացված վարկերի և փոխառությունների մայր գումարի մնացորդը հաշվետու տարվա դեկտեմբերի 31-ի դրությամբ կազմել է 29 մլն 888 հազար դրամ, որը բնակարանի հիպոտեկի մայր գումարի մնացորդն է։
«Ժողովուրդ» օրաթերթը տեղեկանում է, որ դատավորը գրեթե 30 մլն դրամով 2024 թվականին ձեռք է բերել բնակարան»։
Մանրամասները՝ «Ժողովուրդ» օրաթերթի այսօրվա համարում:
