Կա շարունակական դիվանագիտական աշխատանք գերիների ազատ արձակման և Հայաստան վերադարձնելու հարցի շուրջ: Այս մասին, այսօր՝ ապրիլի 2-ին, ԱԺ-ում լրագրողների հետ զրույցում նշեց ՔՊ-ական պատգամավոր, ԱԺ արտաքին հարաբերությունների հանձնաժողովի նախագահ Սարգիս Խանդանյանը:
«Այդ աշխատանքը շարունակվում է, դա ամենօրյա աշխատանք է թե Հայաստանի կառավարության և թե մեր խորհրդարանական դիվանագիտության տեսանկյունից: Բայց նաև պիտի շեշտեմ, որ խաղաղության գործընթացը ևս ինքնին շատ կարևոր պրոցես է այդ հարցի լուծման համար: Դիրքորոշում այն է, որ գերիները պետք է ազատ արձակվեն և վերադարձվեն, և այդ դատական դատական գործերը, այդ պրոցեսները դադարեցվեն, որովհետև դրանք անընդունելի են և մարդու և մարդասիրական իրավունքի որևէ նորմին չեն համապատասխանում»,-ասաց նա:
Խանդանյանը նկատեց, որ տրամաբանական չի լինի, որ ստորագրվի խաղաղության պայմանագիրը, ՀՀ քաղաքացիները լինեն գերեվարության մեջ Ադրբեջանում: Այսինքն սա տրամաբանության հարց է, խաղաղության տրամաբանությունն այդպիսին է, բայց իհարկե, մեր ակնկալիքն այն է, որ որքան հնարավոր է շուտ ազատ արձակվեն գերիները, որովհետև դա հումանիտար հարց է ու քաղաքական դիվանագիտական բանակցություններում որպես նախապայման դրա ներառումը ես կարծում եմ՝ ընդունելի չէ:
Հարցին՝ կա՞ն ինչ-որ երկրներ, կազմակերպություններ, որոնք ազդակ են հղել, որ իրենք պատրաստ են միջնորդել կամ ասել Բաքվին, կամ առաջարկել, որ վերադարձվեն գերիները, նա պատասխանեց. «Խորհրդարանական հարթակների գործիքը հայտարարություններն են և այդ այդ տեսակ ազդեցություններն են: Դուք գիտեք, որ Եվրոպական պառլամենտն է բանաձև ընդունել, մի շարք խորհրդարաններ հայտարարություններ և բանաձևեր են ընդունել։ Ես քիչ առաջ իմացա, որ Միացյալ Թագավորության խորհրդարանի մի շարք պատգամավորներ իրենց կառավարությանն են նամակ հղել պահանջելով ջանքեր գործադրել, որպեսզի հայ գերիները ազատ արձակվեն։
Ինչ վերաբերում է գործադիր իշխանություններին, անընդհատ կա խոսակցություն տարբեր երկրների կառավարությունների հետ, լրացուցիչ ազդեցություն թողնելու, և երբ որ այդպիսի հնարավորություն լինի լինի, հանրությանը հայտնի կդառնա: Քանի դեռ արդյունքներ չկան, չեմ կարող այս պահին որևէ բան ասել»:
