ՏԵՍԱՆՅՈՒԹ․ Ուզում եմ առանձնակի հպարտությամբ շեշտել Մատաղիսում և Թալիշում մեր Հատուկ նշանակության բրիգադի հատուկ ջոկատայինների կատարած փայլուն օպերացիաները. Արշակ Կարապետյանի գրառումը

9 տարի առաջ այս օրը Ադրբեջանը լայնածավալ ռազմական գործողություններ սկսեց Արցախի ուղղությամբ:
Ուզում եմ առանձնակի հպարտությամբ շեշտել Մատաղիսում և Թալիշում մեր Հատուկ նշանակության բրիգադի հատուկ ջոկատայինների կատարած փայլուն օպերացիաները, որոնք իմ անմիջական հրամանով ջախջախեցին ադրբեջանական «Յաշմա»-ի բավականին լավ պատրաստված կազմին այնպես, որ տարիներ էր պահանջվում Ադրբեջանին` այն կրկին համալրելու համար: Հայկական կողմի հմուտ գործողությունների արդյունքում Թալիշի զորամասում մեր բրիգադի տղաները նորից բարձրացրեցին հայոց եռագույնը:

Այս տղաները դեռևս ամիսներ առաջ դարձյալ իմ հրամանով շաբաթներ շարունակ հերթափոխով գտնվում էին Մատաղիսում և Թալիշում` հատուկ ծրագրված ծառայություն և գործողություններ նախապատրաստելու համար: Անշուշտ, այս մասին բարձրաձայնում ենք միայն այսօր:

Ինչու եմ ես կարևորում Հայոց բանակի պատմության այս էջերը. մենք կասկած չպիտի ունենանք, որ հերոսական ու հաղթական օրեր նորից ունենալու ենք, մենք այս նպատակով ու պատրաստակամությամբ պետք է ապրենք մեր ամեն օրը, վստա´հ լինելով, որ այս տղաները հանուն հաղթանակած Հայաստանի են կռվել և հաղթել:
Տեսանյությում` հատուկ ջոկատայիններ` մայոր Կարեն Բաբայան, հրահանգիչներ` մայոր Հովիկ Սիմոնյան (позывной -Սարմատ), կապիտան Մկրտիչ Հարությունյան (позывной — Մգրո)
Պատիվ և խոնարհում ՊՆ և ՊԲ բոլոր հայորդիներին, կամավորներին ու աշխարհազորին

Գեներալ-մայոր Արշակ Կարապետյան