ԱՄՆ Լուիզիանա նահանգի Smitty’s Supply նավթավերամշակման գործարանում տեղի են ունեցել մի շարք հզոր պայթյուններ, որոնք մեծածավալ հրդեհի պատճառ են դարձել։ Իշխանությունները տարհանում են գործարանից ընդամենը երկու կիլոմետր հեռավորության վրա գտնվող Ռոուզլենդ քաղաքի բնակիչներին։
Զոհերի մասին դեռևս տեղեկություններ չկան։
Ականատեսները հայտնում են, որ խիտ ծուխը երևում է մի քանի տասնյակ կիլոմետր հեռավորությունից։ Վթարի վայր են ուղարկվել նահանգի տարբեր շրջաններից մասնագիտացված հրշեջ խմբեր՝ հրդեհը մարելու համար։ Հրդեհի ինտենսիվության և նոր պայթյունների մշտական սպառնալիքի պատճառով հրշեջների աշխատանքը բարդանում է։
Մասնագետները վախենում են հրդեհի հետևանքով շրջակա միջավայրի լուրջ աղտոտումից։ Նավթամթերքների այրումը մթնոլորտ է արտանետում թունավոր նյութեր, որոնք կարող են բացասաբար անդրադառնալ մարդու առողջության և բուսականության վիճակի վրա։
