Նիկոլ Փաշինյանը բացառում է, որ այսօր Մայր Աթոռ Սուրբ Էջմիածնում բախումներ կլինեն։
«ՀՀ իրավապահ մարմիններն ունեն բոլոր գործիքակազմն ու հնարավորությունները սադրիչ գործելակերպով աչքի ընկնող բոլոր անձանց չեզոքացնելու օրենքով սահմանված կարգով»,- լրագրողների հետ զրույցում հայտարարեց նա։
Փաշինյանի խոսքով՝ Հայ առաքելական սուրբ եկեղեցին պետք է պաշտպանել Ամենայն հայոց կաթողիկոսից ու «Մայր Աթոռը զավթած մյուս աղանդավորների խմբից»։
Նա ասաց, թե Վեհափառ Հայրապետն ու մյուս հոգևորականներն աղանդավորներ են ու եղծում են եկեղեցու դավանանքը։
Ինչ վերաբերում է եկեղեցու դեմ արշավում իրեն միացած ու «տիրադավ» անունը ստացած եպիսկոպոսներին՝ նա հավատացրեց, թե, իբր, ինքը չի ուղղորդում նրանց, բայց ընդգծեց՝ ողջունում է նրանց քայլերն ու աջակցում է։
Փաշինյանը նշեց, թե իրեն ու «տիրադավ» եպիսկոպոսներին միավորում է միայն եկեղեցու նորոգման օրակարգը։
Նիկոլ Փաշինյանը հայտարարեց նաև, թե Ամենայն հայոց կաթողիկոսի որևէ որոշում իրենք չեն ընդունելու։
Ըստ նրա՝ Ստեփան Ասատրյանը շարունակում է իրենց համար մնալ «Տեր Արամ», Արամայիս Թախմազյանը՝ «Տեր Թադե», Վարդան Հունանյանը՝ «Տեր Տարոն»։
