Ղարաբաղը Հայաստանին վերադարձնելու շարժումը չի կարող շարունակվել, ապրիլի 1-ին Ռուսաստանի նախագահ Վլադիմիր Պուտինի հետ հանդիպման ժամանակ հայտարարել է ՀՀ վարչապետ Նիկոլ Փաշինյանը:
«Ինչ վերաբերում է Լեռնային Ղարաբաղին առնչվող հարցերին, ես արդեն շատ թափանցիկ և հրապարակայնորեն Հայաստանի Հանրապետությունում հայտարարել եմ, որ մենք չպետք է շարունակենք ղարաբաղյան շարժումը, քանի որ Հայաստանի և Ադրբեջանի միջև արդեն իսկ խաղաղություն է հաստատվել»,- նշել է նա։
Ըստ նրա` խաղաղություն է հաստատվել Հայաստանի և Ադրբեջանի միջև, և երկու երկրները ճանաչել են միմյանց տարածքային ամբողջականությունը։ «Այո, մենք ճանաչել ենք Ղարաբաղը` որպես Ադրբեջանի մաս, բայց դա արել ենք միայն այն բանից հետո, երբ Ռուսաստանի Դաշնության բարձրագույն ղեկավարությունը երկու անգամ հրապարակավ հայտարարել է այդ մասին։ Հիշում եք, մենք սա քննարկել ենք մեկից ավելի անգամ»,- նշել է նա։
Փաշինյանը հիշեցրել է նաև, որ Հայաստանն ու Ադրբեջանը ճանաչել են միմյանց տարածքային ամբողջականությունը, քաղաքական անկախությունը և ինքնիշխանությունը՝ հիմնվելով 1991 թվականի Ալմաթիի հռչակագրի վրա։ Նա հայտարարել է, որ երկու կողմերն էլ փոխադարձաբար ճանաչում են, որ «անկախ Հայաստանը 100%-ով նույնական է Խորհրդային Հայաստանին, իսկ անկախ Ադրբեջանը՝ Խորհրդայինին»։ Փաշինյանը հավելել է, որ այդ իրավիճակը ամուր հիմք է ստեղծում խաղաղության հետագա զարգացման համար։
