Իրանի հետ առևտրի սահմանափակումները Հայաստանի վրա չեն ազդի։ Այսօր կառավարության նիստից հետո լրագրողների հետ զրույցում այս մասին ասաց Հայաստանի վարչապետ Նիկոլ Փաշինյանը՝ պատասխանելով հարցին, թե կարո՞ղ է առաջանալ որոշ ապրանքների պակաս։
Փաշինյանի խոսով՝ Հայաստանը վաղուց պատրաստվել էր այս իրավիճակին։
«Մեզ համար շատ ցավալի է այն, ինչ տեղի է ունենում Իրանի Իսլամական Հանրապետության շուրջ և ընդհանրապես տարածաշրջանում, սակայն մենք պետք է արձանագրենք, որ այս իրավիճակը նոր չէ։ Նրանք, ովքեր հետևում են միջազգային լրահոսին, պետք է առնվազն մտավախություն ունենային, որ նման իրադրություն կլինի։ Մենք այս իրավիճակի հետ կապված աշխատանքային խումբ ունենք. այդ աշխատանքային խումբը մի տարի կամ տարիուկես առաջ է ձևավորվել, և այդ աշխատանքային խումբը երբեմն ամենօրյա, երբեմն ամենժամյա կամ ամսական ռեժիմով աշխատել է ու աշխատում է»,– ասաց նա։
Փաշինյանը հայտարարեց, թե իր իշխանությունը տարածաշրջանում ընթացող իրադարձությունների նկատմամբ անտարբեր չէ, այլ նախապես է որոշումներ կայացրել։
«Վաղուց ձեռնարկել ենք միջոցներ, քանի որ ռազմական իրադարձություններ Իրանում եղան նաև 6 ամիս առաջ, որից հետո ակնհայտ չէր, որ այն այլևս չի լինելու»,– նշեց Փաշինյանը։
