Իրավապաշտպան կազմակերպությունները, ակտիվիստները և մտահոգ քաղաքացիները հավաքվել են Բեռլինի Բրանդենբուրգյան դարպասների մոտ՝ պահանջելով անհապաղ ազատ արձակել Ադրբեջանում ապօրինի պահվող հայ գերիներին։
Բողոքի ակցիան կազմակերպել են Գերմանիայի հայերի կենտրոնական խորհուրդը, Խոցելի ժողովուրդների պաշտպանության միությունը, Գերմանիայի «Տեոֆանու» ակումբը, «Ճանաչում` ընդդեմ ցեղասպանության» աշխատանքային խումբը, «Հանուն միջազգային փոխըմբռնման» կազմակերպությունը և Free Armenian Hostages քաղաքացիական շարժումը։
Նրանք կոչ են արել եվրոպացի առաջնորդներին շտապ միջոցներ ձեռնարկել Ադրբեջանում մարդու իրավունքների խախտումների հետ կապված։
Ակցիայի կազմակերպիչներն ուշադրություն են հրավիրել Ադրբեջանի կողմից հայերի պարբերական հալածանքների և գերիների խնդիրը բանակցություններում որպես սակարկության գործիք օգտագործելու վրա։
«Ձերբակալվածները, այդ թվում՝ Ռուբեն Վարդանյանը, անմարդկային պայմաններում են, նրանց նկատմամբ խոշտանգումների և դաժան վերաբերմունքի մասին հաղորդումներ են եղել։ Վարդանյանն այժմ հացադուլ է իրականացնում, նրա կյանքին վտանգ է սպառնում։ Մենք չենք կարող լռել», – հայտարարել է Հայերի կենտրոնական խորհրդի վարչության նախագահ Ջոնաթան Սպանգենբերգը։
Հիշեցնենք, որ հունվարի 17-ից Ադրբեջանում ընթանում է Արցախի նախկին ռազմաքաղաքական առաջնորդների գործով «դատավարությունը»: Մեղադրյալների թվում են նախկին նախագահներ Արկադի Ղուկասյանը, Բակո Սահակյանը, Արայիկ Հարությունյանը, պաշտպանության բանակի նախկին հրամանատար Լևոն Մնացականյանը, նախկին արտգործնախարար Դավիթ Բաբայանը և այլք:
Նախկին պետնախարար և բարերար Ռուբեն Վարդանյանի գործը քննվում է առանձին վարույթով: Չնայած գործի նյութերը մյուսների հետ միավորելու նրա խնդրանքին` դատարանը որոշել է 422 հատորներից 400-ը դիտարկել առանձին:
Փետրվարի 26-ին, հայտնի դարձավ,, որ Ռուբեն Վարդանյանի առողջական վիճակը կտրուկ վատացել է, քանի որ նա ադրբեջանական բանտում փետրվարի 19–ից հացադուլ է սկսել։
