«Փաստինֆոն» գրում է. Այս պահին արտահանող բեռնատարաների վարորդները բողոքի ակցիա են իրականացնում Չարբախում։ Նրանք բողոքում են, որ «Սպայկա» ընկերությունը փորձում է, ոլորտում մենաշնորհ հաստատելով, դուրս մղել անհատ վարորդներին, այդ պատճառով սկսել է արտոնյալ պայմաններում համագործակցել արտերկրի բեռանփոխադրողների հետ։
«Վարկով մեքենա ենք առել, որ ընտանիք պահենք, բայց «Սպայկան» է քանդում ոլորտը, չի թողում, որ ոչ մի մասնավոր վարորդ աշխատի՝ առանց իր թույլտվության, հիմա էլ սկսել է համագործակցել արտերկրի բեռնափոխադրման կազմակերպություններ հետ՝ մեզ շուկայից դուրս մղելու համար»,-«Փաստինֆոյի» հետ զրույցում ասաց ակցիայի մասնակիցը։
Ցուցարարների պնդմամբ, օրենսդրական կարգավորումների բացակայության և «Սպայկայի» մենաշնորհ հաստատելու պատճառով 800 անհատ վարորդ կանգնել է հացի խնդրի առջև։
««Սպայկան» հարկային արտանություն է ստանում, այլ երկրների բեռնափոխադրողները հարկ չեն տալիս, բայց պետությունը մեզ քամում է»,-նշում էին բողոքի դուրս եկած քաղաքացիները։
Նրանք պահանջում են հավասար մրցակցության պայմաններ հաստատել և օրենսդրական կարգավորումներ նախաձեռնել՝ ոլորտը կանոնակարգելու համար։
