Ռուսական կողմը մշտական կապի մեջ է իր հայ գործընկերների հետ՝ Հայաստանում ռուսական կոնցեսիայի ներքո գտնվող երկաթուղային հատվածների վերականգնման վերաբերյալ։ Երեւանից ստացված բոլոր հարցումները անհապաղ քննարկվում են համապատասխան գերատեսչությունների կողմից։ Այս մասին հայտնել է ՌԴ ԱԳՆ պաշտոնական ներկայացուցիչ Մարիա Զախարովան ամենշաբաթյա ճեպազրույցի ժամանակ։
Այս մեկնաբանությունը հնչել է ՀՀ վարչապետ Նիկոլ Փաշինյանի հայտարարությունների ֆոնին, որը նախկինում հայտարարել էր, որ խնդրել է Մոսկվային արագացնել Ադրբեջանի հետ սահման տանող, ինչպես նաեւ Ադրբեջանի եւ Թուրքիայի ուղղությամբ երկաթուղային հատվածների վերականգնման վերաբերյալ որոշումների կայացումը։ Սակայն, ինչպես ընդգծել է ՀՀ վարչապետը, սա չի ներառում Մեղրիով անցնող հատվածը, որը նախատեսվում է իրականացնել որպես առանձին TRIPP նախագծի մաս։
Փաշինյանը նաեւ հայտնել է, որ եթե ռուսական կողմը չկարողանա կարճ ժամկետում սկսել վերականգնման աշխատանքները, ՀՀ կառավարությունը պատրաստ է այդ հատվածները հանել կոնցեսիայից եւ վերանորոգումներ իրականացնել սեփական միջոցներով։
Պատասխանելով «TRIPP նախագծի» վերաբերյալ հարցին՝ Մարիա Զախարովան նշել է, որ Ռուսաստանը հաստատում է իր պատրաստակամությունը՝ ուսումնասիրել այս նախաձեռնությանը մասնակցելու հնարավոր տարբերակները, այդ թվում՝ հաշվի առնելով «Ռուսական երկաթուղիներ»-ի եզակի փորձը։ Նա միաժամանակ ընդգծել է, որ նախ անհրաժեշտ է ծանոթանալ նախագծի իրականացման եւ շահագործման բոլոր ասպեկտներին, քանի որ, ըստ որոշ տեղեկությունների, դրա մշակումը գտնվում է սկզբնական փուլում։
ՌՍ ԱԳՆ պաշտոնական ներկայացուցիչը նաեւ ավելացրել է, որ Ռուսաստանի առաջարկը՝ Երեւանի հետ բոլոր շահագրգիռ գերատեսչությունների մասնակցությամբ առարկայական խորհրդակցություններ անցկացնելու վերաբերյալ, մնում է ուժի մեջ։
