Ռուսաստանի ԱԳՆ պաշոտնական ներկայացուցիչ Մարիա Զախարովան մեկնաբանել է Հայաստանում անցկացվելիք խորհրդարանական ընտրությունների ազդեցությունը Մոսկվայի և Երևանի համագործակցության վրա, ներառյալ՝ Հավաքական անվտանգության պայմանագրի կազմակերպության (ՀԱՊԿ) շրջանակում։
Հարցը տրվել է Բելառուսի նախագահ Ալեքսանդր Լուկաշենկոյի հայտարարության համատեքստում, որը ապրիլի 6-ին ՀԱՊԿ գլխավոր քարտուղար Իմանգալի Տասմագամբետովի հետ հանդիպման ժամանակ կոչ է արել կազմակերպությանը զգույշ լինել Հայաստանի հետ հարաբերություններում՝ հաշվի առնելով հանրապետության ներքաղաքական իրավիճակը և առաջիկա ընտրությունները։
Զախարովան նշել է, որ ռուս-հայկական հարաբերություններին վերաբերող հարցերը մանրամասն քննարկվել են Ռուսաստանի նախագահ Վլադիմիր Պուտինի և Հայաստանի վարչապետ Նիկոլ Փաշինյանի վերջերս Մոսկվայում անցկացված հանդիպման ժամանակ, որը տեղի է ունեցել ապրիլի 1-ին՝ Հայաստանի ղեկավարի աշխատանքային այցի շրջանակում։
Ըստ նրա՝ ընտրությունների համատեքստում ռուսական կողմը վերահաստատել է այլ պետությունների ներքին գործերին չմիջամտելու իր սկզբունքային դիրքորոշումը։
«Մենք չենք միջամտում այլ պետությունների ներքաղաքական գործերին։ Դա մեր սկզբունքային դիրքորոշումն է»,- ընդգծել է նա։
Միևնույն ժամանակ, Զախարովան մատնանշեց Ռուսաստանի և Հայաստանի միջև հարաբերությունների առանձնահատկությունը, որոնք զարգացել են դարերի ընթացքում։
Նա նշել է, որ երկրները կապված են պատմական, մշակութային և քաղաքակրթական կապերի լայն շրջանակով։ Մասնավորապես, Ռուսաստանը բազմամիլիոնանոց հայկական սփյուռքի հայրենիք է, և հենց Հայաստանում, նշել է նա, կան զգալի թվով քաղաքական ուժեր, որոնք կենտրոնացած են Մոսկվայի հետ կառուցողական փոխգործակցության զարգացման վրա։
«Դա բիզնես նախագիծ չէ, այլ պատմական էության մի մաս, հենց այն կապերը, որոնք պարզապես չեն կարող խզվել»,- հայտարարել է Զախարովան։
Հաշվի առնելով դա, Ռուսաստանի ԱԳՆ պաշտոնական ներկայացուցիչն ընդգծել է, որ Ռուսաստանը չի կարող անտեսել Հայաստանում տեղի ունեցող քաղաքական գործընթացները։ Սակայն նա շեշտել է, որ խոսքը միջամտության մասին չէ, այլ պարզապես շահագրգռվածության մասին՝ ապահովելու, որ բոլոր քաղաքացիները հնարավորություն ունենան ազատորեն արտահայտել իրենց դիրքորոշումը։
Նա հույս է հայտնել, որ Ռուսաստանի հետ հարաբերությունների զարգացմանը կողմ ընտրողները կկարողանան իրացնել ընտրություններին մասնակցելու իրենց իրավունքը հավասար պայմաններում։
«Կարևոր է, որ քվեարկելու իրավունք ունեցող բոլոր Հայաստանի քաղաքացիները կարողանան դա անել ազատ և ժողովրդավարական ճանապարհով, ինչպես ընդունված է քաղաքակիրթ երկրներում»,- ընդգծել է Զախարովան։
Այդ համատեքստում նա ուշադրություն է հրավիրել Հայաստանի ընտրական օրենսդրության վերջին փոփոխությունների վրա: Ըստ նրա՝ Ընտրական օրենսգրքի փոփոխությունները հապճեպ ընդունվել են և որոշակի հարցեր են առաջացնում ռուսական կողմի մոտ։
Զախարովան նշել է, որ Մոսկվան շարունակում է ուսումնասիրել այդ նորամուծությունները, քանի որ դրանք կարող են էական սահմանափակումներ մտցնել, մասնավորապես՝ ընտրություններին մասնակցող քաղաքական ուժերի անվանման վերաբերյալ։
Նա ընդգծել է այն կարևորությունը, որ նման միջոցները չօգտագործվեն ընդդիմության հնարավորությունները սահմանափակելու համար։
«Գլխավորն այն է, որ դա չօգտագործվի ընդդիմության ընտրական հնարավորությունները դիտավորյալ սահմանափակելու նպատակով»,- նշել է նա։
Զախարովան հիշեցրել է նաև ՀՀ վարչապետ Նիկոլ Փաշինյանի խոսքերը, որը ավելի վաղ հայտարարել էր երկրի հավատարմության մասին ժողովրդավարական սկզբունքներին։
«Հայաստանը ժողովրդավարական երկիր է»,- մեջբերել է նա ՀՀ կառավարության ղեկավարի խոսքերը։
Ռուսաստանի ԱԳՆ պաշտոնական ներկայացուցիչը անդրադարձել է նաև ՀԱՊԿ-ին Հայաստանի մասնակցության հարցին: Ըստ նրա՝ վերջերս այս հարցի շուրջ բազմաթիվ հակասական հայտարարություններ և ենթադրություններ են եղել։
«Այնքան շատ ենթադրություններ և տարբեր գնահատականներ կան, որ այն արդեն սկսում է նմանվել անմաքրաբարո բանի»,- նշել է նա։
Զախարովան ընդգծել է, որ իրավական տեսանկյունից իրավիճակը մնում է անփոփոխ. Հայաստանը ՀԱՊԿ-ի լիիրավ անդամ է՝ դրանից բխող բոլոր իրավունքներով և պարտավորություններով։
«Չնայած բազմաթիվ բանավոր հայտարարություններին և կեղծիքներին, այլ որոշում չի ընդունվել»,- նշել է նա։
Եզրափակելով՝ Զախարովան նշել է, որ Ռուսաստանը շահագրգռված է, որ Հայաստանը վերականգնի իր լիակատար մասնակցությունը կազմակերպության գործունեությանը։
«Մենք, իհարկե, շահագրգռված ենք, որ հայկական կողմը վերադառնա մեր համատեղ անվտանգության կառուցվածքին լիակատար մասնակցությանը»,- եզրափակել է Ռուսաստանի ԱԳՆ պաշտոնական ներկայացուցիչը։
