Ազգային ժողովի փոխնախագահ Ռուբեն Ռուբինյանը հայտարարել է, որ Հայաստանը պատերազմ չի հրահրել և ոչ էլ դադարեցրել է բանակցային գործընթացը։
Լրագրողների հետ զրույցում Ռուբինյանը նշել է․ «Ես համաձայն չեմ Ջեյհուն Բայրամովի, Ռոբերտ Քոչարյանի, Սերժ Սարգսյանի ու Լևոն Տեր-Պետրոսյանի հետ, այդ փաստերը ճիշտ չեն»։
Նրա խոսքով՝ Հայաստանի նախկին նախագահները հաճախ նշել են, թե նախկինում եղել են «հանճարեղ առաջարկներ», սակայն, ինչպես ընդգծել է Ռուբինյանը, դրանք չեն իրագործվել։
«Եթե այդպիսի առաջարկներ կային՝ ինչո՞ւ չեն իրագործվել։ Մադրիդյան սկզբունքներով ենթադրվող առաջարկները նախատեսում էին, որ հայկական ուժերը դուրս են գալիս 7 շրջաններից, Լեռնային Ղարաբաղում և Լաչինի միջանցքում տեղակայվում են ռուս խաղաղապահներ, իսկ կարգավիճակի հարցին անդրադարձ չի լինում։ Այս ամենը իրականում տեղի ունեցավ նոյեմբերի 9-ի հայտարարությամբ»,– ասել է նա։
Ռուբինյանի խոսքով՝ 2023 թվականի սեպտեմբերյան իրադարձությունները ցույց տվեցին, որ ռուս խաղաղապահների ներկայությունը չի կանխել Ադրբեջանի կողմից Լեռնային Ղարաբաղի ամբողջական վերահսկողության հաստատումը։
