Մինչ փոխնախագահ Ջեյ Դի Վենսը պատրաստվում է այս ամսվա վերջին Հայաստան և Ադրբեջան կատարելիք դիվանագիտական այցին, բանտարկված հայ քրիստոնյա Ռուբեն Վարդանյանի որդի Դավիթ Վարդանյանը կոչ է անում Թրամփի վարչակազմին ճնշում գործադրել այն բանտարկյալների ազատ արձակման համար, որոնք դեռևս պահվում են ադրբեջանական կալանքի տակ 2023 թվականի սեպտեմբերին Լեռնային Ղարաբաղի հայաթափումից հետո: Այս մասին փոխանցում է Catholic Vote-ը:
Փետրվարի 4-ին Zeale News-ին տված հարցազրույցում Դավիթ Վարդանյանը նկարագրել է իր հոր՝ հայտնի հայ բարերար և Լեռնային Ղարաբաղի նախկին պետական նախարար Ռուբեն Վարդանյանի ձերբակալությունը։
Վարդանյանն ասել է, որ իր հայրը ձերբակալվել է զանգվածային ձերբակալության շրջանակներում, որի արդյունքում անօրինական կերպով ձերբակալվել է առնվազն 22 հայ՝ տարածաշրջանում Ադրբեջանի ռազմական հարձակումից հետո։
«Սա զանգվածային ձերբակալություն էր, որը կատարվել էր ավելի քան 120,000 քրիստոնյա հայերի էթնիկ զտման ավարտին»,-ասել է Վարդանյանը։
Նա ասել է, որ ադրբեջանական ուժերը մի քանի ամիս շրջափակել էին Լեռնային Ղարաբաղը՝ փակելով աշխարհի ամենահին քրիստոնեական ազգի՝ Հայաստանի հետ կապող միակ ճանապարհը։
Լեռնային Ղարաբաղը, որը հայտնի է նաև որպես Արցախ, ավելի քան 2000 տարի բնակեցված է եղել հայերով և, ըստ Վարդանյանի, ամենահին հայկական բնակավայրերից մեկն է։
Վարդանյանն ասաց, որ իր հայրը տեղափոխվել է տարածաշրջան 2020 թվականի Հայաստանի և Ադրբեջանի միջև պատերազմից հետո՝ տեղի քրիստոնյա բնակչությանը աջակցելու համար, որը, նրա կարծիքով, «լքված էր աշխարհի կողմից»։
«Նա որոշեց հրաժարվել իր ամբողջ կյանքից և վտանգել ամեն ինչ: Նա փորձեց պաշտպանել նրանց՝ ապրել նրանց հետ ամենադժվարին ժամին։ Եվ նա վճարում է խաղաղ միջոցներով պաշտպանելու փորձերի համար»,-ասել է Ռուբեն Վարդանյանի որդին:
Կալանքի պայմանները
Վարդանյանը հոր դեմ առաջադրված մեղադրանքները՝ մոտ 40 կետ, այդ թվում՝ ահաբեկչության ֆինանսավորման և սահմանի անօրինական հատման մեղադրանքներ, որակեց որպես շինծու և ասաց, որ դատավարությունները զուրկ են տարրական իրավական երաշխիքներից։
Նա ասաց, որ Ադրբեջանը Ռուբեն Վարդանյանին դատում է ռազմական տրիբունալում, չնայած նա երբեք ռազմական պաշտոն չի զբաղեցրել, ինչը միջազգային նորմերի խախտում է։ «Նա, ըստ էության, քաղաքական շոուի դատավարության մեջ է»,-ասել է բարերարի որդին:
Ընտանիքի միակ կապը այժմ կարճ, խիստ վերահսկվող հեռախոսազանգերի միջոցով է։ Ավելին, նրա հայրը պահվել է մենախցում և ենթարկվել է բռնության։ Ադրբեջանը չի հրապարակել ձերբակալվածների ամբողջական ցուցակը։ Վարդանյանը նշել է, որ չորսի ազատ արձակումից հետո ներկայումս հաստատվել է, որ կա 19 բանտարկյալ, սակայն ընդհանուր թիվը կարող է ավելի մեծ լինել անհայտ կորած ռազմագերիների պատճառով։
Քրիստոնյաների հալածանքները Ադրբեջանում
Վարդանյանը նաև ասել է, որ կալանավորվածները սահմանափակումների են ենթարկվում իրենց քրիստոնեական հավատքը դավանելու հարցում։
Նա ասաց, որ հոր կալանքի առաջին շաբաթվա ընթացքում նրան Աստվածաշունչ և հայկական քրիստոնեության մեկ այլ հիմնարար տեքստ ուղարկելու փորձերը մերժվել են, չնայած իշխանությունները թույլատրել են մի քանի այլ գրքերի ուղարկումը։
Ինչ կլինի հետո
Ռազմագերիների նկատմամբ նոր ուշադրությունը հրավիրվում է այն ժամանակ, երբ Վենսը, ինչպես սպասվում է, կայցելի Հայաստան և Ադրբեջան՝ ԱՄՆ դիվանագիտական առաջխաղացման շրջանակներում, որը կապված է նախագահ Դոնալդ Թրամփի առաջարկած «Թրամփի երթուղին միջազգային խաղաղության և բարգավաճման համար» տարածաշրջանային տրանսպորտային և տնտեսական նախաձեռնության հետ։
Ըստ Վարդանյանի՝ օգոստոսյան իրադարձությունը չհանգեցրեց խաղաղության պայմանագրի ստորագրմանը, այլ հանգեցրեց շրջանակային տեքստի նախաստորագրմանը, որը, նրա խոսքով, որևէ հղում չի անում հայ կալանավորվածներին։ «Դուք չեք կարող քրիստոնյա պատանդներ պահել բանտախցերում և ակնկալել, որ աշխարհը կհավատա իրական խաղաղության գոյությանը»,-ասել է նա:
Վարդանյանը շնորհակալություն հայտնեց Թրամփին և ԱՄՆ-ին՝ ամբողջ աշխարհում քրիստոնյաների պաշտպանությունը առաջնահերթություն տալու համար և նշեց, որ Թրամփը նախկինում անդրադարձել է հայ բանտարկյալների ճակատագրին։
Ըստ OC Media-ի՝ Թրամփը օգոստոսին Հայաստանի վարչապետ Նիկոլ Փաշինյանին ասել է, որ մտադիր է դիմել Ադրբեջանում պահվող բանտարկյալներին ազատ արձակելու խնդրանքով և ասել, որ հավատում է, որ Բաքուն կհամաձայնվի։
«Սա եզակի հնարավորություն է կրկին աշխարհին ցույց տալու, որ նախագահն ու փոխնախագահը լուրջ են վերաբերվում իրենց ասածներին: Քրիստոնյաների պաշտպանությունը այս վարչակազմի համար գլխավոր առաջնահերթություն է ոչ միայն ԱՄՆ-ում, այլև ամբողջ աշխարհում»։
Նա ասաց, որ փոխնախագահը, որը հրապարակավ խոսել է քրիստոնյաների համաշխարհային հալածանքների մասին, կարող է օգնել ապահովել բանտարկյալների ազատ արձակումը՝ տարածաշրջանային առաջնորդների հետ անմիջական շփման միջոցով։
