Մանրամասներ չեմ ուզում ասել, որովհետեւ դա մեր ներթիմային հարցերն են, որոնք մենք պարբերաբար քննարկում ենք, մտնել մանրամասների մեջ էթիկապես ճիշտ չեմ համարում: Այս մասին, այսօր՝ նոյեմբերի 1-ին, ԱԺ-ում լրագրողների հետ զրույցում նշեց ՔՊ խմբակցության պատգամավոր Հրաչյա Հակոբյանը՝ անդրադառնալով նախօրեին ՔՊ-ում տեղի ունեցած հանդիպմանը, որտեղ, ըստ Փաշինյանի, միմյանց սուր քննադատել են:
Նա հավելեց, որ այդ ներթիմային քննադատությունների արդյունքում որոեւէ որոշում չի կայացվել:
Հարցին՝ ԱԺ պաշտպանության եւ անվտանգության հարցերի հանձնաժողովի նախագահ Անդրանիկ Քոչարյանից դժգոհություն կա՞, հատկապես, որ դժգոհողների շարքում նշվում է նաեւ իր անունը, Հակոբյանը պատասխանեց, որ մամուլից է իմացել, որ ինքը իբր դժգոհ է եւ նախաձեռնել է ինչ-որ գործընթաց:
ՔՊ-ական պատգամավորը վստահեցրեց, որ որեւէ ազդակ չունի, որ հնարավոր են հրաժարականներ:
«Ժանրը եղել է ինքնաքննադատություն, եւ մենք խոսել ենք ներթիմային հարցերի մասին: Ես էլ եմ ասում, որ եղել է անողոք պայքար, բայց բովանդակությունը չեմ ասում: Նմանատիպ քննարկումներ շատ են եղել մեր թիմում: Շատ է եղել, որ հավաքվել ենք փակ դռների հետեւում, դռները փակել ենք, խոսել ենք ամեն ինչի մասին, քննադատել ենք իրար, վերջում դուրս ենք եկել»,-ասաց նա:
Ճշտող հարցին՝ Անդրանիկ Քոչարյանից դժգոհություն կա՞, Հակոբյանն արձագանքեց. «Ինձնից սկսած բոլորի աշխատանքից դժգոհություն կա: Դուք ամեն ինչ անում եք, որ փակագծեր բացեմ երեկվա հանդիպումից, չեմ բացելու»:
