Օրեր առաջ Aysor.am-ը գրել էր, որ դեկտեմբերին ԱԺ նախագահ Ալեն Սիմոնյանի կարգադրությամբ՝ Ամանորի և Սուրբ Ծննդյան տոների առթիվ պարգևատրվել են պատգամավորները, աշխատակազմի պետական ծառայողներն ու աշխատողները:
Սիմոնյանի մեկ այլ կարգադրությամբ պագամավորներն ու աշխատակիցները դարձյալ խրախուսական պարգևատրումներ էին ստացել:
Aysor.am-ը գրավոր հարցում էր ուղարկել ԱԺ աշխատակազմի ղեկավար-գլխավոր քարտուղար Դավիթ Առաքելյանին, պարզելու՝ պարգևատրումներն ինչքա՞ն են կազմել, ի՞նչ դրույքաչափով են հաշվարկվել:
Դավիթ Առաքելյանը մեր գրավոր հարցմանն ի պատասխան տեղեկացրել է, որ պարգևատրումների վերաբերյալ ԱԺ նախագահի կարգադրությունները հասանելի են խորհրդարանի պաշտոնական կայքում:
ԱԺ աշխատակազմից միաժամանակ նշել են, որ խորհրդարանի համար նախատեսված խրախուսման ֆոնդը հատկացվել է ՀՀ կառավարության 2025 թվականի դեկտեմբերի 4-ի N 1763-Ն որոշմամբ:
Մինչդեռ Ալեն Սիմոնյանի ստորագրած կարգադրության մեջ բացակայում են հավելվածները, որտեղից կարող էինք տեղեկանալ պատգամավորներին փոխանցված պարգևատրումների չափերի մասին:
«Հայաստան» խմբակցության պատգամավոր Քրիստինե Վարդանյանը Aysor.am-ին ասաց, որ Ազգային ժողովի պատգամավորներին դեկտեմբերին փոխանցվել է 3 միլիոն դրամի չափով գումար: Նրա խոսքով՝ այն ներառում է նաև դեկտեմբեր և հունվար ամիսների աշխատավարձը և պարգևավճարը:
Պատգամավորի փոխանցմամբ՝ ինքն էլ հստակ չգիտի, թե 3 միլիոնից որքանն է կազմում պարգևավճարը, որքանն՝ աշխատավարձը:
Նշենք՝ եթե խորհրդարանն ունի 107 պատամավոր և յուրաքանչյուրին փոխանցվել է 3 միլիոն դրամ, ստացվում է, որ տարեվերջին շուրջ 300 միլիոն դրամ է պետբյուջեից պատգամավորներին հատկացվել:
Հավելենք նաև՝ «Հայաստան» խմբակցությունից հայտարարել էին, որ տարեվերջին Ազգային Ժողովի կողմից տրված պարգևավճարն իրենց խմբակցության պատգամավորներն ուղղում են տարբեր խմբերի սոցիալական աջակցությանը։
