… Ուշադիր նայեք այս լուսավոր տղաների դեմքերին։ Իրենք ա’յն հերոսներն են, ովքեր ևս մնացին հավերժ դիրքապահ։ Իրենք ա’յն հերոսներն են, որոնց ընտանիքը հինգը տարի շարունակ` ամեն վայրկյան հրաշքի էր սպասում…որ վերադառնալու են…
Վերադարձան հերոսացած` Արցախի դրոշն ու Եռագույնը հավիտյան գրկած։
…Մեր պատերազմը շարունակվում է։ Եվ հինգ տարի անց դեռ հայ զինվորների մասունքներ ենք հանձնում Հայոց հողին։
…Արցախյան 44-օրյա պատերազմից 5 տարի անց գտնվել և ԴՆԹ հետազոտության միջոցով նույնականացվել են հանուն հայրենիքի հերոսաբար ընկած եղբայրներ Գևորգ և Գոռ Հովհաննիսյանների մարմինները։
Սիսիանի համայնքապետարանի էջից տեղեկանում ենք, որ Գևորգ և Գոռ Հովհաննիսյանների հոգեհանգիստը տեղի է ունենալու այսօր` փետրվարի 16-ին` ժամը 17։00-ից 20։00-ը, Սիսիանի Սուրբ Գրիգոր Լուսավորիչ եկեղեցում։ Հուղարկավորությունը կլինի փետրվարի 17-ին` ժամը 13։00-ին, Սիսիանի քաղաքային պանթեոնում։
…Վաղը Հայոց հողը իր գիրկը կառնի ևս երկու քաջորդիների` ծնված Սյունյաց աշխարհում։ Իմ մտքում դարձյալ Սյունյաց աշխարհում ծնված հերոս` Արցախյան ազատամարտիկ , բանաստեղծ Աղվան Մինադյանի բանաստեղծության տողերն են, որը նա գրել է մարտի դաշտում , և այն դարձել է պատերազմի ցավի խտացում։ Այսպես կարող էր գրել միայն մարտի դաշտում կյանքը տվող ազատամարտիկ Պոետը …
<<Կարմիր դագաղով անիծյալ կյանքն են տանում թաղելու
Երբ վերջալույսի կրակվող աչքը ելնում է սեղան,
Եվ որտեղ որ է՝ երկինքը հիմա թատրոն է տալու,
Մարդիկ ոռնում են մենակ մնացած գայլերի նման.-
Կարմիր դագաղով երազ ու սեր են տանում թաղելու։
Հորիզոնները վառվեցին կրքից՝ վայրենի ու խենթ,
Մութը ցրվում է՝ քարանձավներում իր վիշտը լալու,
Մարդիկ մենակ են ցավի ու թախծի թաց տրտմության հետ.-
Կարմիր դագաղով թախիծ ու սեր են տանում թաղելու։
Արյունոտ կեսօր, հրդեհվեց կյանքի ամայության մեջ,
Շուրջը ալիքվեց՝ Թանատոսի սև ստվերին հլու,
Գեղեցկությունը մեռավ մահացող թաց աչքերի մեջ.-
Կարմիր դագաղով կյանք ու իղձեր են տանում թաղելու։
Արշալույսները լուռ խարխափում են մայրամուտի մեջ,
Այսօրվա օրը ո՞ւմ թարթիչներն է արցունքոտելու,
Մարդիկ վշտի մեջ կանգնել են մենակ.-
Կարմիր դագաղով սիրտ ու կրակ են տանում թաղելու։
Օրը էլ չունի ժամ ու ժամանակ՝ հաշված է ժամը,
Երկինքը տարավ արևին ուրիշ հողում վառելու,
Մարդկանց թողել են վախից դողալու մահվան սև վարակ.-
Կարմիր դագաղով հառաչ ու լաց են տանում թաղելու։
Աղվան Մինասյան>>։
…Մեր ազատամարտիկներից ոչ ոք երբևէ չէր պատկերացնի, որ իրենց ազատագրած սրբազան Հողը մի օր` հակահայ մի խմբակ դավադրաբար հանձնելու է թշնամուն։
Մեր եղբայրները ևս չիմացան, որ… իրենց պահած Հողը դավադրաբար հանձնվել է և կռվում էին մինչև սրտի վերջին զարկը… Եվ թող ոչ մի ապազգային ու հակահայ տեսակ չկարծի, թե մեր եղբայրների ընդհատված թռիչքը մնալու է անպատասխան։ Նրանց պատմական դատը տեսնելու ենք …Իսկ յուրաքանչյուր քաջորդու կերպարն ու անունը ապրելու է մեր մեջ և դաստիարակելու է վրիժառու ու պահանջատեր սերունդներ։ Մենք դա իրենց խոստանում ենք…
Բոլորիս խոնարհում ձեզ , Գոռ և Գևորգ Հովհաննիսյաններ։
Ձեր անկատար երազանքների ու մեզնից խլված Հայրենիքի համար պատասխան տալու ժամը գալու է…
Հասմիկ Պողոսյան
