Փաստաբան Արա Զոհրաբյանը Միքայել արքեպիսկոպոս Աջապահյանի ձերբակալությունը որակել է խոշտանգում և խոսքի ազատության սկզբունքի ոտնահարում:
Ելույթ ունենալով ՀԱԵ Շիրակի թեմի առաջնորդի գործով առաջին դատական նիստին՝ Զոհրաբյանը հայտարարել է, որ պետությունը զրկել է բարձրաստիճան հոգևորականին կրոնական ծիսակատարություններ կատարելու և ծխականների հետ շփվելու հնարավորությունից:
Բացի այդ, կալանքի տակ գտնվելու ընթացքում Աջապահյանի առողջական վիճակը վատացել է, սակայն մեկուսարանում գտնվելու 50 օրվա մեջ 62-ամյա արքեպիսկոպոսը ոչ մի անգամ չի բողոքել՝ անտրտունջ դիմանալով բոլոր զրկանքներին ու դժվարություններին:
Զոհրաբյանը համոզված է, որ հեղաշրջման ճանապարհով իշխանափոխության անհրաժեշտության մասին հայտնի հարցազրույցում արված հայտարարությունները որևէ կերպ չեն կարող հիմք հանդիսանալ Միքայել Աջապահյանին կալանավորելու համար: Նա հիշեցրել է, որ Հայաստանում շատ ավելի ծանր հանցագործություններ կատարելու մեջ մեղադրվող անձինք այսօր ազատության մեջ են։
Հիշեցնենք՝ հունիսի 27-ին ՀՀ ազգային անվտանգության ծառայության հատուկջոկատայինները մտան Մայր աթոռ Սուրբ Էջմիածին՝ վեհարանի բակ՝ ձերբակալելու Շիրակի թեմի առաջնորդ Միքայել արքեպիսկոպոս Աջապահյանին, ապա հեռացան։ Աջապահյանն ինքը ներկայացավ ՔԿ։ Հունիսի 28-ին նա կալանավորվեց։ Նրա նկատմամբ քրեական գործ է հարուցվել իշխանությունը զավթելուն, տարածքային ամբողջականությունը խախտելուն, ինքնիշխանությունից հրաժարվելուն կամ սահմանադրական կարգը բռնի տապալելուն ուղղված հրապարակային կոչերի հոդվածով։
