Հայաստանը անկախության ձեռքբերումից ի վեր կանգնած է եկեղեցու և պետության միջև ամենալուրջ բախման շեմին, քանի որ շարունակում է աճել վարչապետ Նիկոլ Փաշինյանի և Հայ Առաքելական Եկեղեցու առաջնորդ Կաթողիկոս Գարեգին Բ-ի միջև լարվածությունը, գրում է Radio Free Europe / Radio Liberty-ն:
Ինչպես նշվում է, վեճը հանգեցրել է ձերբակալությունների, հրապարակային մեղադրանքների և հայկական ինքնության, կառավարման համակարգի, երկրի աշխարհաքաղաքական կողմնորոշման, ինչպես նաև վարչապետի կողմից պետության սահմանադրության նկատմամբ հարգանքի վերաբերյալ հակասական վարկածների:
Այս դիմակայությունը կարող է փոխել Հայաստանի քաղաքական լանդշաֆտը և սփյուռքի հետ նրա հարաբերությունները՝ հաջորդ տարվա հունիսին կայանալիք խորհրդարանական ընտրությունների նախաշեմին։ Եկեղեցու և պետության միջև հակամարտությունը տեղի է ունենում Հայաստանի համար զգայուն ժամանակահատվածում, քանի որ երկիրը մոտենում է հունիսին նախատեսված խորհրդարանական ընտրություններին:
Կառավարության գործողությունների քննադատները մատնանշում են, որ հոգևորականների ձերբակալությունները և եկեղեցու նկատմամբ հետաքննությունները խախտում են եկեղեցու և պետության տարանջատման սահմանադրական սկզբունքը:
Մեկ այլ զգայուն թեմա է Հայաստանի և Ադրբեջանի միջև խաղաղության համաձայնագիրը: Թեև երկու երկրների առաջնորդները օգոստոսին նախաստորագրել են խաղաղության պայմանագրի նախագիծը, այնուամենայնիվ վերջնական համաձայնագիրը մինչ օրս պաշտոնապես չի ստորագրվել և չի վավերացվել:
Այնուամենայնիվ, վարչապետը չի թուլացրել ճնշումը՝ վերջերս հաստատելով, որ ինքը հանձնարարել է Ազգային անվտանգության ծառայությանը գրաքննության ենթարկել եկեղեցական ժամերգությունները՝ հրահանգելով քահանաներին պատարագների ժամանակ չհիշատակել Գարեգին Բ-ի անունը:
