«Առավոտ»-ն իր խմբագրականում գրում է. «Ինձ թվում է, որ ցանկացած հեղափոխությունից հետո անհրաժեշտ է որոշակի կայունացման ժամանակաշրջան՝ այնպես չէ, որ հեղափոխական զանգվածները ամիսներով թափառելու են փողոցներով և անելու են իրենց ուզածը: Բոլորը՝ ժամանակավոր, թե մշտական իշխանությունը վաղ թե ուշ կարգի է հրավիրելու «Ավրորայի» նավաստիներին կամ «հերոս տղերքին», անհրաժեշտ կլինի դարձյալ ոստիկանություն, վերահսկողություն, ռեպրեսիվ ապարատ և այլն: Դեռ հարց է՝ արդյոք այդ «նավաստիները» կամ «ռոմանտիկները» կենթարկվեն այդ կարգուկանոնին, թե կասեն՝ «քանի որ ժողովուրդը հաղթել է, մեզ բան ասող չպիտի լինի»: Բայց, ենթադրենք, ենթարկվեցին: Արդյո՞ք նոր ռեպրեսիվ ապարատն ավելի լավը կլինի, քան հինը, արդյո՞ք «նավաստիների» վերահսկողությունը բավարար կլինի, որ ապարատը փոխվի: Եվ Հայաստանի համար ամենակարևոր հարցը՝ որքա՞ն է տևելու այն «կայունացման շրջանը» և ի՞նչ է այդ ժամանակահատվածում կատարվելու մեր սահմաններին:
Իհարկե, այդ ամենին ի պատասխան՝ բերվում է «վարդերի հեղափոխությունը» Վրաստանում: Եթե Արևմուտքը որոշի նման ծրագիր իրականացնել Հայաստանում, դա կունենա իր դրական և բացասական կողմերը: Մեր դեպքում բացասականն, իմ կարծիքով, ավելի շատ կլինի»,-գրում է թերթը:
Նյութն ամբողջությամբ կարդացեք թերթի այսօրվա համարում: