«Կրթության մասին» ՀՀ օրենքում փոփոխություններ կատարելու մասին» օրենքի նախագծի քննարկմանը «ԲՀԿ» պատգամավոր Միքայել Մելքումյանը նշեց, որ առաջարկը պարզ սխեմա է, և պետք չէ խորանալ ու ասել, թե այն կարող է առաջացնել բուհերի ինքնավարության խնդիր: «Այստեղ նման խնդիր չկա»,- ասաց նա:
Նա, դիմելով ԿԳ փոխնախարար Արևիկ Անափիոսյանին, նշեց, թե խոսում են բուհերի ինքնավարությունից, բայց շատ ավելի նման միջամտության դեպքեր կան: «Ընդհանրապես պետք է վերջ տալ, որ դիմումներ գրեն նախարարություն, որ այնտեղ թույլ տան ևս մեկ անգամ հանձնել քննությունը, այդ բաներին պետք է վերջ տալ, բայց ինքներդ պետք է նախաձեռնեք, ոչ թե ներքևից ասեք՝ այլևս մեզ դիմումներ չգրեք, որ 6-րդ, 7-րդ կամ 9-րդ անգամ հանձնեն քննություն»,- ասաց նա:
Բացի դրանից, պատգամավորը նշեց, որ հիմա վարձավճարի տարաժամկետման հարցն են որոշում, բայց ավելի հետաքրքիր է, թե ուսման վճարի գինն ո՞վ է որոշում: «Պետությո՞ւնն է սահմանում, թե՞ ով, և նաև որակի հարցը…նախարարությունը կամ չգիտեմ ով վերահսկում է որակը, այսօր բուհն ավարտած շրջանավարտների ո՞ր տոկոսն է, որ բավարարում է շուկայի պահանջին, և ո՞նց գնահատենք դա, որ հասկանանք՝ որակյա՞լ մասնագետ են թողարկում, աշխատա՞նք չկա, թե՞ մասնագետ չկա»,- ասաց նա:
Ըստ նրա՝ պետք է հստակ ծրագիր մշակեն և կրթական ծրագրերը աշխատաշուկայի պահանջարկին համապատասխանեցնեն, թե չէ կառավարությունները փոխվում են, ասում են՝ մեզ 7 տարի պետք է դրա համար, փոխարենը գործիքակազմ ունենան:
«Օրինակ, ասեն, որ վերահսկում ենք որակը, և դրա համար չափանիշ լինի, որ բոլորը, օրինակ, պետք է երկու-երեք օտար լեզու իմանան, երկրորդ՝ անգրագետ կամ կիսագրագետ շրջանավարտ չլինի, երրորդ՝ պետական հանձնաժողովները, որոնք որ թողարկում են, հասկանան՝ պատասխանատվության ռեժիմ կա, թե չկա, թե ամեն հարյուր ավարտածից, 10-ը չեն բավարում այսօրվա ստանդարտներին»,- ասաց նա:
Միքայել Մելքումյանի ենթադրությամբ՝ կրթության խնդիրը որակի մեջ է: «Մենք չենք կարողանում համարժեք որակի մասնագետներ պատրաստել»,- ասաց նա:
