Գագիկ Ծառուկյանը տոկոս ստանալու համար «դոշ չի ծեծելու». այս մասին լրագրողների հետ զրույցում ասաց ԲՀԿ նախագահ Գագիկ Ծառուկյանը՝ խոսելով խորհրդարանական առաջիկա ընտրությունների մասին:
Նա նշեց, որ կուսակցության ցուցակը գլխավորելու է ինքը, բայց չի առաջադրվելու ռեյտինգայինով: Իսկ թե ովքե՞ր են լինելու հաջորդ համարները, նա ասաց. «Երբ որ ցուցակը կկազմեմ, արդեն բան չի մնացել, դուք տեղյակ կլինեք»:
Վերջինս հավաստիացրեց, որ ինքը «տոկոս ստանալու համար դոշ չի ծեծելու», ներկայացնելու է իր ծրագիրը:
«Վստահում եք, ինչքան եք վստահում ինձ, այնդքան էլ կարող եմ անել: Ինչքանով կվստահեք դա է: Ես ոչ դրանով ճանաչում եմ ձեռքբերելու, ոչ էլ ինչ-որ բանի տեր եմ դառնալու: Հարյուր անգամ ասել եմ՝ մարդը կայացած, ճանաչված մարդ է, ուզում է լավ բան անի, հնարավորություններն օգտագործի ի օգուտ իր երկրի: Միայն դա է ճանապարհը»,- ասաց նա:
Հարցին՝ հնարավո՞ր է որ ԲՀԿ-ին այլ ուժեր միանան, ներկայանաք դաշինքով, Գագիկ Ծառուկյանը պատասխանեց. «Մենք դեռ քննարկում ենք: Պետք է նայենք՝ դաշինքը մեզ ի՞նչ է տալու: Այսօր բոլորը կուսակցություններ ունեն, սպասելիքները, ամբիցիաները այնքան մեծ են, որ ում հետ խոսում ես՝ 15-20 տոկոս ձայն ունի: Բա եթե ունի, մեր հետ ի՞նչ գործ ունի»:
Անդրադառնալով այն լուրերին, որ ԲՀԿ-ում ներկուսակցական խմորումներ են սկսվել, Գագիկ Ծառուկյանը նշեց, որ ինքը տեղյակ չէ:
Հարցին՝ լրագրող Պետրոս Ղազարյանը, ով Երևանի ավագանու ընտրություններում ԲՀԿ ցուցակում էր, լինելո՞ւ է խորհրդարանական ցուցակում, հաշվի առնելով լուրերը, որ «Կենտրոն» հեռուստաընկերությունից տեղափոխվում է Հանրային, Ծառուկյանն այսպես պատասխանեց. «Դա լավ է:
Առաջ են տանում, դա վա՞տ է: Կքննարկենք, կարող է ինքը ծանրաբեռնված լինի: Մենք ոչ մեկի հետ խնդիր չունենք: Մարդ ինքն է որոշում իր ճակատագիրը»:
Իսկ այն հարցին՝ Նաիրա Զոհրաբյանը լինելո՞ւ է ցուցակում, Ծառուկյանը պատասխանեց. «Ինչու՞ առանց Նաիրա Զոհրաբյանի ԲՀԿ-ն լինո՞ւմ է»: Գագիկ Ծառուկյանը նաև հերքեց տեղեկությունները, որ իր և Զոհրաբյանի հարաբերությունները լարված են։
Լրագրողների հարցին՝ ընտրություններից հետո հնարավո՞ր է Նիկոլ Փաշինյանի իշխանությանը ընդդիմություն դառնաք, նա պատասխանեց. «Ամեն ինչ կախված է ընտրություններից: Ես շարժման կողմնակիցն եմ, Նիկոլ Փաշինյանի աջակիցն եմ, կողքն եմ լինելու»:
Ճշտող հարցին՝ կոալիցիայո՞ւմ եք ձեզ տեսնում, թե՞ ընդդիմության մեջ, նա պատասխանեց. «Որտեղ որ անհրաժեշտություն լինի, ոչ մի խնդիր չկա: Մենք դա չենք անում պաշտոնի համար, ուզում ենք մեր երկիրը կառուցենք: Մենք ընտրությանը մասնակցելու ենք, ծրագրի վրա աշխատում են: Գիտենք՝ ինչ պետք է անենք, որ ժամկետում»: Նա ասաց, որ ընտրությունից հետո ամեն ինչ պարզ կլինի: