Ադրբեջանի գերիների, պատանդների և անհայտ կորածների հարցերով պետական կոմիտեում քննարկվում է Բաքվում պահվող հայերի հետ Արցախում դատապարտված ադրբեջանցի դիվերսանտների փոխանակման հնարավորությունը:
«Մենք դիմել ենք մի քանի միջազգային կազմակերպություններ` Հայաստանում գտնվող Դիլհամ Ասկերովի և Շահբազ Գուլիևի ազատ արձակման հարցով: Մեր կողմից այս հարցով աշխատանք կատարվում է: Կարող է նաև քննարկվել Ադրբեջանում պահվող հայերի հետ փոխանակման հարցը»,- Vzglyad.az-ի փոխանցմամբ ասել է պետական կոմիտեի քարտուղար Իսմայիլ Ախունդովը:
Հրատարակության տվյալներով` ներկայումս Ադրբեջանում են գտնվում Հայաստանի քաղաքացի Զավեն Կարապետյանը և Արցախի քաղաքացի Արսեն Բաղդասարյանը:
Հիշեցնենք, որ Ադրբեջանի մոտ գերի ընկած «հայ դիվերսանտ» Զավեն Կարապետյանը, ինչպես պարզվել է, անտուն էր, իսկ Արցախի քաղաքացի Արսեն Բաղդասարյանը Բաքվում դատապարտվել է 15 տարի ժամկետով ազատազրկման` դիվերսիայի մասին Ադրբեջանի կողմից սարքված գործով:
