Ազգային ժողովի Առողջապահության եւ սոցիալական հարցերի մշտական հանձնաժողովի նիստի ավարտից հետո, աշխատանքի եւ սոցիալական հարցերի նախարար Արտեմ Ասատրյանը լրագրողների հետ ճեպազրույցում խոսեց Կարեն Կարապետյանի ղեկավարած մեկամյա կառավարության մասին: Պատասխանելով այն հարցին, թե Հովիկ Աբրահամյանի կառավարությունն էր առավել նպաստավոր, թե՞ Կարապետյանինը, նախարարը թեեւ անուններ չտվեց, բայց հաստատեց, որ Կարապետյանի օրոք մի շարք բարեփոխումներ են կատարվել:
«Ես կարծում եմ, որ այս ժամանակահատվածում կատարված աշխատանքները բավականին արդյունք են ապահովել: Բոլոր ծրագրերի առումով՝ մենք ունենք բավականին գրանցած արդյունքներ: Կյանքն այնքանով է թեթեւացել, որ շուրջ 10 հազար քաղաքացի ընտանեկան նպաստի ծրագրի համար չի այցելել տարածքային կենտրոն, այլ առցանց տարբերակով դիմումը ներկայացրել է»,- ասաց Արտեմ Ասատրյանը:
Նախարարի վերջին պատասխանը փաստացի դժգոհություն էր նախկին ղեկավարից` Հովիկ Աբրահամյանից: