Շուշիի համար մարտերի թեժ օրերին Արցախի նախագահ Արայիկ Հարությունյանին զեկուցվել է, որ վիճակը լավ է։ Այս մասին այսօր լրագրողներին ասաց Շուշիի քաղաքապետ Արծվիկ Սարգսյանը։
«Նոյեմբերի 4-ի լույս 5-ի գիշերը Արայիկ Հարությունյանը եկավ Շուշի՝ ծանոթանալու, թե ինչ է կատարվում Շուշիում։ Այդ ժամանակ ապաստարանում, ես էլ ներկա էի, Սեյրան Օհանյանը ներկայացրեց, որ վիճակը անտանելի է, արդեն օրհասական պահ է ստեղծվել Շուշիի համար։ Ինքը լսեց, դրանից հետո հարցրեց, մի հատ գնդապետ կար, անունը չեմ իմանում, էդ գնդապետից հարցրեց՝ ո՞նց է վիճակը, նա ասաց՝ հոյակապ, լավ է։ Ես լավ բան չեմ տեսել, գիտեի, որ Քարինտակում ադրբեջանցիներ են, ճանապարհին ադրբեջանցիներ են։ Եթե էդքանը կար, էլ լավը ինչո՞ւմ էր կայանում։ Ես չեմ նկատել, որ Արայիկ Հարությունյանը տեղյակ է եղել ինչ է լինելու, ինքը հանդիպում ու ոգևորում էր մարդկանց։ Բայց էն, որ իրեն զեկուցվել է՝ վիճակը լավ է, այ սա հանցագործություն է»,- ասաց Սարգսյանը։
Նա անդրադարձավ նաև հարցին, որ Պաշտպանության բանակի կողմից այդ օրերին Իսկանդերով հարված է հասցվել Շուշիին։ «Երբ ուսումնասիրում ես Իսկանդերի հնարավորությունները, մինչև անգամ 9 բալանոց երկրաշարժ պիտի առաջանա, եթե Իսկանդերը կրակում են։ Դա չի եղել։ Եթե Իսկանդերը լիներ, Շուշիում պիտի շենք չմնար, որովհետև հին շենքեր են։ Իրենց ասելով՝ պետք է Շուշիի հինմնահատակ քանդված լիներ, բայց Շուշին կանգնած է»,- նշեց Սարգսյանը։
