Բացի 4 գերիներից, ադրբեջանական կողմը Հայաստանին է հանձնել մեկ զոհված քաղաքացու մարմին։ Sputnik Արմենիայի թղթակցի հետ զրույցում ասաց ՀՀ քննչական կոմիտեի հանձնարարությունների, կազմակերպական-վերլուծական և քրեագիտական գլխավոր վարչության քրեագիտական վարչության պետ Ռաֆայել Վարդանյանը։
Նա չհստակեցրեց՝ զոհվածը զինծառայող է, թե քաղաքացիական անձ։ Վարդանյանը նշեց, որ գերիների վերադարձը կազմակերպել է Լեռնային Ղարաբաղում ռուսական խաղաղապահ զորախմբի հրամանատար Ռուստամ Մուրադովը:
«Հայրենիք վերադարձած գերիները տղամարդիկ են, նրանց թվում կան ինչպես զինվորականներ, այնպես էլ քաղաքացիական անձինք: Բացի այդ, հանձնվել է մեկ մահացածի մարմին»,–ասաց Վարդանյանը։
Հիշեցնենք` ՀՀ փոխվարչապետ Տիգրան Ավինյանն այսօր հայտնել էր, որ Ռուսաստանի Դաշնության և Կարմիր խաչի միջազգային կոմիտեի միջնորդությամբ այսօր 4 հայ գերիներ վերադարձել են Հայաստան: Ռուսաստանի պաշտպանության նախարարությունն էլ տեղեկացրել էր, որ Հայաստանը երկու գերի է վերադարձրել Ադրբեջանին։
