ՌԴ նախագահ Վլադիմիր Պուտինը հայտարարել է, որ Հայաստանի եւ Ադրբեջանի զինված ուժերը կանգ են առնում իրենց զբաղեցրած դիրքերի վրա:
«Ադրբեջանի Հանրապետությունն ու Հայաստանի Հանրապետությունը կանգ են առնում իրենց զբաղեցրած դիրքերի վրա: Լեռնային Ղարաբաղի շփման գծի երկայնքով եւ Լեռնային Ղարաբաղը Հայաստանի Հանրապետության հետ կապող միջանցքի երկայնքով տեղակայվելու են Ռուսաստանի Դաշնության խաղաղապահներ»,-նշել է ՌԴ նախագահը՝ խոսելով իր, Ադրբեջանի նախագահի եւ Հայաստանի վարչապետի կողմից ստորագրված համատեղ հայտարարության մասին:
Լեռնային Ղարաբաղում մարտական գործողությունների դադարեցման մասին պայմանավորվածությունը ենթադրում է նաեւ ռազմագերիների եւ զոհվածների մարմինների եւ մյուս պահվող անձանց փոխանակում:
«Ապաարգելափակվում են տնտեսական եւ տրանսպորտային բոլոր կապերը: Տրանսպորտային հաղորդակցությունը հսկում են այդ թվում Ռուսաստանի սահմանային ծառայության մարմինները»,-հավելել է Պուտինը:
