Վերջին խորհրդարանական ընտրություններից օրեր առաջ էր, որ վարչապետ Կարեն Կարապետյանն անդրադարձավ բազմաբնակարանային շենքերի կառավարման ոլորտի խնդիրներին, որոնք տարիներ շարունակ գտնվում են պորտաբույծ մի կառույցի` համատիրություն կոչվածի ձեռքին: Վարչապետն այդ ժամանակ, որ տարված էր նախընտրական թոհուբոհով, մեծ ու փոքր խոստումներով ` ասաց. «Մենք կայացած համատիրություններ չունենք: Մենք պետությունով այս հանձնարարականի հիման վրա լայնամասշտաբ ծրագիր ենք անելու համայնքներում, որ մի անգամ բոլոր շենքերի խնդիրները լուծենք »: Երկու ամիս ժամանակ տվեց որպեսզի ծրագիր մշակվի և ներկայացվի տեղեկատվություն համատիրությունների, բազմաբնակարան շենքերի, նկուղների, տանիքների, աստիճանավանդակների մուտքերի և այլնի մասին: Այդ հանձնարարականից անցել է հինգ ամիս: Այս ընթացքում ջրերը շարունակում են հոսել բազմաբնակարան շենքերի նկուղներ, տարածքներում առնետների ու աղբի ներկայությունն օրեցօր ավելի է ամրապնդվում, և փաստացի ոչինչ չի փոխվում, կամ փոխվում է այնքանով, որ նկուղներում հոսող ջրերից բազմաբնակարան շենքերի հիմքերն էլ ավելի են խարխլվում և վարչապետին զեկուցելու փոխարեն քաղաքապետին է զեկուցվում: Աշխատանքային հերթական խորհրդակցության ընթացքում Տարոն Մարգարյանին զեկուցվել է, որ օրենքի նախագծի մշակման ուղղությամբ աշխատանքները շարունակվում են: Իսկ դեռ որքան կշարունակվեն և երբ կամ ընդհանրապես Երևանի բազմաբնակարան շերքերին բախտ կվիճակվի արժանանալ պատշաճ կառավարման, այդ մասին ոչ մի խոսք: Մինչդեռ Տարոն Մարգարյանը տարբեր երկրների իր գործընկերների հետ հանդիպման ժամանակ պարզ, մարդկային հարցման մեխանիզմով անգամ կարող է հասկանալ, թե տարբեր քաղաքներում ինչպես է լինում, որ առանց համատիրություն կոչվածի` շենքերն ավելի մաքուր են ու բարվոք: Տարոն Մարգարյանն այդ առիթն ուներ նախօրեին Մարսելի քաղաքապետի հետ հանդիպմանը` քննարկելու ու պարզելու, թե որտեղ է գաղտնիքը, որ Մարսելի հայազգի քաղաքապետը շատ ավելի փոքր աշխատավայրում է վարում իր աշխատանքները, քան Տարոն Մարգարյանի նստավայրն է, բայց Երևանում ամեն օր շենքերի հիմքերն էլ ավելի են թուլանում, իսկ Մարսելում, ամենահին շենքերին ամեն օր նոր շունչ է հաղորդվում: Ավելին` Փարիզի կենտրոնում Նապոլեոնյան ժամանակների բնակելի շենքերը ոչ միայն խնամված ու ամրացված են, այլ նաև զբոսաշրջիկների համար հետաքրքիր ` իրենց պատմությամբ: Տարոն Մարգարյանը հնարավորությունը բաց է թողնում , քանի որ համատիրությունների գոյությունը ձեռնտու է մի քանի առումներով`ընտրություններին` ձայներ են բերում, ընտրություններից հետո շարունակում մնալ անվերահսկելի ֆինանսների տիրապետող մի օղակ:
Armlife.am
