«Առիթից օգտվելով նախ ուզում եմ շնորհավորել Արցախի ժողովրդին էս օրվա կապակցությամբ. 29 տարի առաջ այս օրը Արցախի ժողովուրդը կարողացավ ուժ գտնել իր մեջ և անկախացավ: Արցախի Հանրապետության ամենամեծ ձեռքբերումը անկախությունն է, Արցախի Հանրապետության բանակը և այսօրվա այս իրավիճակը»,- Արցախի Անկախության 29-րդ տարեդարձի կապակցությամբ «Առաջին լրատվական»-ի հետ զրույցում ասաց ԱԺ «Իմ քայլը» խմբակցության պատգամավոր Սասուն Միքայելյանը:
Նրա խոսքով՝ թավշյա հեղափոխությունից հետո բանակում շատ բան է փոխվել. «Եվ այսօր մենք էլի ունենք հզոր, մարտունակ բանակ տարածաշրջանում: Բայց դա չի նշանակում, որ մենք պիտի արխային ընկնենք, ադրբեջանցիք շատ լավ զինված են, և մենք պետք է կարողանանք մեր համախմբվածությամբ կամաց-կամաց ավելի հզորանալ և, Աստված մի արասցե,պատերազմի դեպքում ոչ միայն դիմակայել, այլև նախահարձակ լինել»:
Դիտարկմանը՝ ներքաղաքական դաշտում որոշակի դերակատարներ պարբերաբար խոսում են Հայաստանի նոր իշխանության՝ Արցախի անվտանգությանը վտանգավոր լինելու մասին, Սասուն Միքայելյանն արձագանքեց. «Ինչ ուզում են՝ թող խոսեն. իրենք լավ գիտեն՝ իրենց ժամանակ ինչ է եղել ստեղ: Դրանք միֆ են, դրանք հեքիաթ են, դրանք անտեղի ոռնոց են: Նրանք պետք է մոռանան, որ երբևիցե նորից կարող են գալ իշխանության»:
