Search
Close this search box.

ՖՈՏՈ. Բռնաբարություն վերապրած աստղը 23 տարեկանում վերջ է տվել կյանքին

Բռնաբարություն վերապրած դերասանուհի Դեյզի Քոուլմենը 23 տարեկանում վերջ է տվել կյանքին։ Այդ մասին նրա մայրը՝ Մելինդա Մելեր Քոուլմենը, հայտնել է Facebook-յան էջում։

Նրա խոսքով՝ Netflix-ի աստղն այդպես էլ չի կարողացել հաղթահարել տեղի ունեցածը։ «Նա իմ լավագույն ընկերն էր ու հիանալի դուստր։ Ես կարծում եմ, որ նա ցանկանում էր ցույց տալ, որ ես կարող եմ առանց իրեն ապրել։ Բայց չեմ կարող։ Ես կցանկանայի վերցնել նրա ամբողջ ցավը»,- ասված է հրապարակման մեջ։

2016թ.-ին Netflix-ում թողարկվել է «Օդրի եւ Դեյզի» ֆիլմը, որում ներկայացվում էր ողբերգության պատմությունը, որը տեղի է ունեցել Քոուլմենի հետ ։Բացի այդ՝ դերասանուհին իր կերպարն է մարմնավորել «Դոմոկրատիա այժմ» սերիալում եւ նկարահանվել «Տեխասյան մահացու ճամփորդություն» սարսափ ֆիլմում։

Քոուլմենը բռնության զոհ է դարձել 2012թ.-ին. նա այդ պահին 14 տարեկան է եղել։ Քոուլմենն ընկերուհու հետ փախել է տնից՝ իր ծանոթին՝ նույն դպրոցի 17-ամյա աշակերտ Մեթյու Բարնեթին հանդիպելու համար. վերջինս նախկին սենատորի թոռն էր ու նրա ընկերը։ Գնալով Բարնեթի տուն՝ Քոուլմենը չափից շատ է խմել, իսկ Մեթյուն բռնաբարել է նրան։ Նրա ընկերը նույն ժամանակ բռնաբարել է մյուս աղջկան, ընդ որում, նրանց մեկ այլ ծանոթ տեղի ունեցածը տեսանկարահանել է։

Դրանից հետո Բարնեթը Քոուլմենին տարել է նրա տան մոտ ու թողել սանդղամուտքի մոտ։ Դեյզիի մոր խոսքով՝ գիշերը ջերմաստիճանը գրեթե զրոյակական է եղել, եւ առավոտյան ինքը դստերը հայտնաբերել է սանդղամուտքում, նրա մազերը գրեթե սառել էին ու կպել հատակին։

Ոստիկանությունը սկսել է հետաքննությունն ու Մեթյու Բարնեթին մեղադրանք առաջադրել (մյուս կասկածյալի՝ 15-ամյա տղայի վերաբերյալ գործը փոխանցվել է անչափահասների գործով դատարան)։ Սակայն շուտով մեղադրանքները հանվել են, իսկ Քոուլմենների ընտանիքը սկսել է անանուն սպառնալիքներ ստանալ։ Ապա Դեյզի Քոուլմենի մայրը հեռացվել է աշխատանքից, իսկ նրանց տունը չպարզված հանգամանքներում այրվել է։ Դեյզիի մայրը ենթադրում էր, որ դա կապված է Մեթյու Բարնետի հոր միջամտության հետ։