Աստված չանի մենք բախվենք այնպիսի իրավիճակի, որ վերակենդանացման բաժանմունքներում ֆիզիկապես տեղ չլինի: Հիշեք, որ այդ պակասող տեղը կարող է անհրաժեշտ լինել ձեր անմիջական հարազատին, կամ հենց ձեզ: Այս մասին ճեպազրույցի ժամանակ հայտարարեց վարչապետ Նիկոլ Փաշինյանը:
Վարչապետը խոսեց նաև դիմակների արդյունավետության մասին՝ հայտարարելով, թե փորձով ապացուցվել է դրանց արդյունավետությունը, եթե այն կիրառվում է համատարած. «Եթե երկու հոգի շփվում են դիմակներով, ու եթե նրանցից մեկը վարակակիր է, 90-95 տոկոս հավանականություն կա, որ վարակը չի անցնի: Մեր հույսը հանրային վարքագծի փոփոխությունն է: Սակայն մենք նաև վարչական լծակներ ենք կիրառելու»:
Փաշինյանը խոսեց վերջին օրերին սկսված անսպասելի ռեյդերի մասին, երբ լայնածավալ ստուգումներ են իրականացվում կոնկրետ վարչական շրջաններում: Նա չբացառեց, որ առաջիկայում կսկսեն ավելի խիստ պատժամիջոցներ կիրառել խախտում անող տնտեսվարողների նկատմամբ՝ դրանց գործունեությունն արգելելով ոչ թե 24 ժամով, այլ ավելի երկար ժամանակով:
