Հակոբ Պարոնյանի անվան երաժշտական կոմեդիայի պետական թատրոնի դերասանուհի Կարինե Բուռնազյանի մոտ, որը մահացել է մայիսի 24-ին, կորոնավիրուս է հաստատվել: Sputnik Արմենիայի թղթակցի հետ զրույցում թատրոնի տնօրեն Կարո Շահբազյանն ասաց, որ դերասանուհին հիվանդանոցում է մահացել:
«Բժիշկներն ինձ ասացին՝ կասկածներ են ունեցել, որ Բուռնազյանը կորոնավիրուսով է վարակված եղել, ինչն էլ արդեն հաստատվել է մահը վրա հասնելուց հետո։ Նա միշտ էլ առողջական խնդիրներ է ունեցել` շաքարախտ, սրտանոթային խնդիրներ։ Անընդհատ բժիշկների հսկողության տակ էր։ Հունվարից ներգրավված չէր ներկայացումներում հենց վատառողջության պատճառով»,-նշեց նա:
Շահբազյանի խոսքով՝ դերասանուհու հուղարկավորությանը չեն մասնակցի, քանի որ շատ մարդկանց ներկայություն չի թույլատրվում:
«Տա Աստված, այս վիրուսն անցնի, մենք ընկերներով կայցելենք նրա շիրիմին ու խունկ կծխենք նրա հոգու հանգստության համար»,– ասաց թատրոնի տնօրենը։
Կարինե Բուռնազյանը ծնվել է 1959 թվականի հունվարի 14-ին Երևանում: 1977 թվականից սովորել է Երևանի Գ. Սունդուկյանի անվան ազգային ակադեմիական թատրոնին կից թատերական ստուդիայում՝ ՀԽՍՀ և ԽՍՀՄ ժողովրդական արտիստ Խորեն Աբրահամյանի արվեստանոցում: 1988 թվականից աշխատում էր Երևանի Հ․ Պարոնյանի անվան երաժշտական կոմեդիայի թատրոնում:
1997-2005 թվականներին «Բոհեմ» թատերախմբով շրջագայել է Եվրոպայում: Խաղացել է «Խանումի արարքները», «Ազգային գործիչ», «Կարինե», «Պարոն Բաբիկը և ուրիշներ» և մի շարք այլ ներկայացումներում:
